ՎԱՀԱՆ ԱՐԾՐՈւՆԻ. 7 ՀԱՐՑ
Երգահան, հեղինակային երգի վարպետ: Թերևս ամենանրբաճաշակ ու գրագետ երաժիշտը հայ բեմում: Անցած տարեվերջին «Արծրունի» ռոք խումբը մեծ համերգային ծրագրով հանդես եկավ, որից հետո հարաբերական դադար է վերցրել: Վահան Արծրունին այժմ զբաղվում է մաշտոցյան շարականների մշակմամբ: Նաև հրավեր է ստացել աշխատել հայ-իրանական ֆիլում, որպես կոմպոզիտոր:
– Ո՞րն է Ձեր նախընտրած մարզաձևը:
– Դպրոցական և ուսանողական տարիներին ակտիվ զբաղվել եմ սպորտով՝ լող, ձյուդո, կարատե: Ընդ որում, նաև լողի մարզիչ եմ և դատավոր: Եթե առանձնացնելու լինեմ, ամեն դեպքում՝ կարատեն:
– Ո՞րն է Ձեր սիրելի ավտոմեքենան, արդյոք վարու՞մ եք:
– Չեմ վարում: Սիրելի ավտոմեքենա չունեմ: Հարմարավետության առումով նախընտրելի են ամենագնացները:
– Ձեր նախընտրած բույրը:
– Դարչինի բույրը:
– Ձեր նախընտրած ձայնը:
– Գալարափողի ձայնը:
– Ինչի՞ց եք ամենաշատը վախենում:
– Մարդկային հիմարությունից:
– Եթե ընդամենը երեք հոգու կարող եք ճաշի հրավիրել, ովքե՞ր են Ձեր հյուրերը:
– Կենասփիլիսոփայության լավագույն ներկայացուցիչը՝ Ֆրիդրիխ Նիցշեն, սիրելի գրողներից՝ Գաբրիել Գարսիա Մարկեսը և 19-րդ դարի հայ ականավոր հրապարակախոս, «Մշակ» թերթի խմբագիր Գրիգոր Արծրունին:
– Եթե հանկարծ հրդեհ պատահի, և դուք հնարավորություն ունենաք տանից միայն մեկ իր փրկելու, ի՞նչը կընտրեք:
– Կիթառներիցս որևէ մեկը:
