«7 ՀԱՐՑ». ՇԻՐԱԿ ԹՈՐՈՍՅԱՆ
«7 Հարց » խորագրի հյուրն է ԱԺ պատգամավոր, ՀՀԿ խմբակցության անդամ, «Ջավախք» հայրենակցական միության նախագահ, «Հզոր Հայրենիք» կուսակցության փոխնախագահ Շիրակ Թորոսյանը:
– Ի՞նչ արժեք (կառույց, ավանդույթ կամ մեկ այլ բան) կուզեիք «հայաֆիկացնել»: – Իհարկե, շատ բաներ կան, որ այլ երկրների մոտ լավ են ստացվում և կարելի է դրանք ներմուծել մեր իրականություն: Հատկապես՝ Արևմուտքում տարածում գտած ժողովրդավարական ձեռքբերումները: Մեր ժողովուրդը դրանց շնորհիվ ավելի կայացած քաղաքացիական հասարակություն կարող է ունենալ:
– Եթե Դուք լինեիք Երևանի քաղաքապետը, ո՞րը կլիներ ձեր առաջին հանձնարարականը: – Գործող քաղաքապետին հարգում և սիրում եմ: Կարծում եմ, որ իր գործը լավ է կատարում: Իհարկե, աշխատելու տեղ միշտ էլ կա: Ինքս կփորձեի քաղաքը բարեկարգել, աղբահանության որակը բարձրացնել, ճարտարապետական տեսքը պահպանել:
– Թվարկեք երեք քայլ, որոնք կնպաստեին հայրենադարձությանը:– Բոլորիս գերխնդիրը պետք է լինի արտագաղթի կասեցումը: Մարդանց համար պետք է կյանքի ավելի նպաստավոր պայմաններ ապահովվեն՝ առաջին հերթին ֆինանսական:
– Հայոց պատմության ողջ ժամանակահատվածի 3 ամենալուսավոր կերպարները՝ Ձեր դիտարկմամբ:– Որպես պատմաբան կարող եմ ասել անուններ, որոնք այնքան էլ հայտնի չեն հանրությանը, այդ մարդիկ եղել են փայլուն դիվանագետներ: Սակայն նշեմ առավել հայտնի և լուսավոր կերպարների՝ Արտաշես Բարեպաշտ թագավոր, Պապ թագավոր և Առաջին Հանրապետության հիմնադիր Արամ Մանուկյան:
– Հայոց պատմության ո՞ր էջը կսրբագրեիք: – Կան էջեր, որոնք կուզեի չլինեին: Եղել են դավաճանություններ ու պարտություններ, որոնք մեզ հետ են գցել:
– Ե՞րբ և ի՞նչն է վերջին անգամ Ձեզ զարմացրել: – Անկեղծ ասած՝ չեմ հիշում: Տեխնոլոգիապես հարուստ ներկա կյանքում դժվար է որևէ բանից զարմանալ, սակայն կյանքում ինձ համար միշտ զարմանքի և զայրութի պատճառ է եղել դավաճանությունը:
– Արդյունքի, հաղթանակի հասնելու Ձեր բաղադրատոմսը: – Համառություն, աշխատասիրություն, նպատակասլացություն:
