ԼՈՌԵՑԻ ՍԱՐԻԲԵԿԸ՝ 7 ՌԵԿՈՐԴԻ ՀԵՂԻՆԱԿ
Վանաձորցի 8-ամյա Սարիբեկ Մոսինյանը երեք մատով հենում – ձգում վարժությունը կատարելով 60 վայրկյանում 83 անգամ,այն որպես ռեկորդ գրանցել է «Assist world records researchfoundation»-ում: Ռեկորդակրի գրանցման մասին վկայող հավաստագիրը օրերս հասել է Հայաստան՝ հասցեատիրոջը: 8-ամյա տղան Հայաստանում 7 ռեկորդների հեղինակ է: Առաջին ռեկորդը Սարիբեկը սահմանել է տարիներ առաջ՝ 2013-ին, 32 րոպեում կատարելով 1111 կքանիստ : Ռեկորդը 2013 թ.-ի գարնանը գրանցվել է Հայաստանի «Դյուցազնագրում»:
Մի քանի ամիս անց տղան սահմանել է երկրորդ ռեկորդը՝ 57րոպեում կատարելով 2013 կքանիստ:Հաջորդ 4 ռեկորդները հայր և որդի Մոսինյանները սահմանել են 2014թ.-ին, 60 վայրկյանում կատարելով 70 կքանիստ և երեք մատով հենում-ձգում վարժությունը՝ 60 վայրկյանում 83 անգամ: Ավելի ուշ տղան 1 տոննա 70 կգ քաշով «Լադա» մակնիշի ավտոմեքենան հրել է 44 մետր՝ մինչ առաջիկա պատնեշը: Չբավարարվելով գրանցած արդյունքով, Սարիբեկը կրկնել է ռեկորդը՝ մեքենայի քաշն ուղևորների հաշվին ավելացնելով շուրջ 200 կգ-ով:
Այս տարի Սարիբեկը, սեփական ռեկորդներից մեկը գերազանցելով, սահմանել է ևս մեկը՝ 60 վայրկյանում կատարելով 76 կքանիստ: Հայր ու որդու տքնաջան աշխատանքի արդյունքում սահմանված ռեկորդները տեղ են գտել «Դյուցազնագրքում»: Որդու ընդունակություններն առաջինը նկատած ու հետևողական աշխատանքի արժանացրած հայրը՝ Արեն Մոսինյանը, վստահ է՝ որդին դեռ զարմացնելու է իր նոր ռեկորդներով:
Տաթևիկ Սարգսյան