Դադիվանքն Արցախի պատմամշակութային ժառանգության կարևոր կենտրոններից է: Ընդամենը մի քանի տարի առաջ վանական համալիրը ծածկված էր հաստ հողաշերտով, տարբեր բարեգործական ֆոնդերի ու անհատների նվիրատվությունների շնորհիվ այն մասամբ բարեկարգվել է և դարձել տուրիստական ակտիվ գոտի:

Դադիվանքը գտնվում է Քարվաճառի շրջանի արևելյան կողմում՝ Թարթառ գետի ձախ ափին՝ բլրի վրա: Այն բաղկացած է եկեղեցիներից, գավիթ-ժամատնից, զանգակատնից, սյունասրահից, և այլ կառույցներից՝ հյուրատուն, հնձան, մառան, սեղանատուն և այլն: Հիմնադրվել է դեռևս 1-ին դարում՝ քրիստոնեական քարոզչություն ծավալելու համար նահատակված Թադևոս առաքյալի աշակերտ Դադիի գերեզմանի տեղում:

Վանքն ունի առանձնացված սրահ, որը տեղացիների խոսքերով ծառայել է որպես գանձատուն:  Դարեր առաջ այստեղ նախ աստիճաններով բարձրացել են վերին հարկ՝ սրահի ներսի կողմից, ապա բացված փոքրիկ անցքի միջոցով իջել ներքև՝ մինչև 25 մետր խորությամբ փորված փոսը:

Հացատունը ևս վերջերս է վերանորոգվել: Մկրտությունից հետո սովորաբար մարդիկ հավաքվում են այստեղ և սեղան նստում:

Որքան էլ զարմանալի է, համալրիրի տարածքում գինու պատրաստման առանձնացված սրահ է եղել: Սրահի վերին հատվածում գետնին ճմլել են խաղողը, որի հյութը հոսելով և համապատասխան անցքերի միջոցով թափվել է 3 կարասների մեջ:

Տաթևիկ Սարգսյան, Արցախ