7 ՀԱՐՑ. ԳՈՀԱՐ ԳԱԼՍՏՅԱՆ
Բանաստեղծ, արձակագիր Գոհար Գալստյանը տպագրության է պատրաստում իր յոթերորդ գիրքը՝ «Նավամատույց» բանաստեղծությունների ժողովածուն:
-Ո՞րն է Ձեր նախընտրած մարզաձևը, ինչու՞: -Լողը, որը և՛ գեղեցիկ է, և՛ շատ օգտակար:
-Ո՞րն է Ձեր նախընտրած օծանելիքը, ինչու՞: – «Gianfranco Ferre» օծանելիքը, որը ձեռք էի բերել Օդեսայից: Յուրահատուկ հիշողություններ են կապված այս օծանելիքի հետ: Հատկանշական է, որ ունեմ բանաստեղծություն՝ «Բույրերի տիրուհին» անվամբ:
-Ձեր նախընտրած բույրը: – Ծաղիկների բույրը: Հարազատ մարդկանց բնորոշ հատուկ բույրը: Մանկության բույրերից՝ տատիկի գոգնոցի, մայիկիս ափերի հոտը:
-Ձեր նախընտրած ձայնը: -Հոսող ջրի, թռչունների ձայնը: Մթնշաղին հաչող շների ձայնը:
-Ինչի՞ց եք ամենաշատը վախենում: – Բնությանը մարդկանց անհարկի միջամտությունից:
-Եթե ընդամենը երեք հոգու կարող եք ճաշի հրավիրել, ովքե՞ր են Ձեր հյուրերը: -Մոցարտը, Վան Գոգը և Բայրոնը:
-Եթե հանկարծ հրդեհ պատահի, և դուք հնարավորություն ունենաք տանից միայն մեկ իր փրկելու, ի՞նչը կընտրեք: -Թույլ չեմ տա, որ Նարեկը կամ Աստվածաշունչն այրվեն: