7 ՀԱՐՑ. ԱՐԵՎԻԿ ԳՐԻԳՈՐՅԱՆ
Խորագրի հյուրն է արվեստագետ, Մատենադարանի ավագ վերականգնող Արևիկ Գրիգորյանը:
– Ի՞նչ արժեք (կառույց, ավանդույթ կամ մեկ այլ բան) կուզեիք «հայաֆիկացնել»: – Ավելորդ չանհանգստանալը: Մեզ մոտ բոլորը կարծես շատ արագ,երբեմն անհիմն խուճապի են մատնվում: Կուզեի, որ մարդիկ հանգստությունն ավելի գնահատեին:
– Եթե Դուք լինեիք Երևանի քաղաքապետը, ո՞րը կլիներ ձեր առաջին հանձնարարականը: -Հնարավորինս կկրճատեի գովազդային վահանակների քանակը, որպեսզի քաղաքի ճարտարապետությունը երևա:
– Թվարկեք երեք քայլ, որոնք կնպաստեին հայրենադարձությանը: – Կաշառակերության վերացումը: Պրոֆեսիոնալիզմի գնահատումը. աշխատանք պետք է ստանան այն մարդիկ, որ գործից իսկապես հասկանում են, աշխատավայրում չպետք է գերակայի ծանոթ-բարեկամ հարաբերությունները: Խաղաղությունը` երկրում և մարդկանց մեջ:
-Հայոց պատմության ողջ ժամանակահատվածի 3 ամենալուսավոր կերպարները՝ Ձեր դիտարկմամբ: – Մեսրոպ Մաշտոց, Վարդգես Սուրենյանց, Արամ Խաչատրյան:
-Հայոց պատմության ո՞ր էջը կսրբագրեիք: – Կուզեի փոխել մեր աշխարհագրական դիրքը և հարևաններին:
– Ե՞րբ և ի՞նչն է վերջին անգամ Ձեզ զարմացրել: – Զարմանում եմ, որ Հայաստանում չկա մի քաղաքական ուժ, որն իրենից արժեք ներկայացնի, հույս ներշնչի և իր ասածներին հավատա:
– Արդյունքի, հաղթանակի հասնելու Ձեր բաղադրատոմսը: – Չհուսահատվել: