«ՈՍԿԻ ՈՐՈՆՈՂՆԵՐԻ» ՀԱՎԱՔ ՌԻՈՅՈՒՄ
Բրազիլիայի մայրաքաղաք Ռիոյում կայանալիք ամառային օլիմպիական 31-րդ խաղերին հաշված օրեր են մնացել։ Տարվա գլխավոր մարզական իրադարձությունը մեկնարկելու է օգոստոսի 5-ին՝ հանրահայտ «Մարականա» ստադիոնում: Օլիմպիադայի փակման արարողությունը կայանալու է օգոստոսի 21-ին։ 206 երկիր ներկայացնող ավելի քան տասը հազար մարզիկ՝ 28 մարզաձևում պայքար է մղելու խաղարկվող մեդալների 306 հավաքածուի համար։Հայաստանը մրցավայր է մեկնում 33 մարզիկով: Նրանք հանդես են գալու 8 մարզաձևում։ Անկախ Հայաստանի պատմության մեջ սա ռեկորդային թիվ է (1992 թվականից սկսած ունեցել ենք համապատասխանաբար 5, 32, 27, 18, 25, 24 մարզիկներից բաղկացած ընտրանիներ): Հայաստանի հավաքականի դրոշակակիրը Ռիոյում՝ երիտասարդ լողորդ Վահան Մխիթարյանն է լինելու։ Օլիմպիական խաղերի մարմնամարզության մրցաշարում Հայաստանն առաջին անգամ կին ներկայացուցիչ է ունենալու: Մեր երկիրն Օլիմպիադայում ներկայացնելու է Հուրի Գեբեշյանը: Օլիմպիական ոսկու համար առաջինը մրցապայքարի է դուրս գալու ձյուդոիստ Հովհաննես Դավթյանը: Նրա ելույթը նախանշված է օգոստոսի 6-ին, Երևանի ժամանակով 17:00-ին: Օգոստոսի 6-ին, 17:30 ելույթ են ունենալու մարմնամարզիկներ Հարություն Մերդինյանը և Արթուր Դավթյանը, 18:00-ին՝ բռնցքամարտիկ Արթուր Հովհաննիսյանը (49 կգ): Օգոստոսի 7-ին, 16:45-ին նախանշված է Հուրի Գեբեշյանի(մարմնամարզություն) ելույթը, 18:45-ին՝ բռնցքամարտիկ Վլադիմիր Մարգարյանի(69 կգ) մրցամարտը: Օգոստոսի 8-ին՝ 16:00-ին մեկնարկելու է հրաձգության մրցաշարը, Հայաստանը ներկայացնելու է Հրաչիկ Բաբայանը, 18:00-ին՝ բռնցքամարտիկ Արթուր Հովհաննիսյանը,իսկ ժամը 19:00-ին՝ բռնցքամարտիկ Վլադիմիր Մարգարյանն են ռինգ դուրս գալու: Ժամանակագրություն շարունակությունը կներկայացնենք «Ճամփորդի» հաջորդ համարում:Հիշեցնենք, որ վերջին անգամ Հայաստանը Օլիմպիական խաղերում ոսկե մեդալ է նվաճել 20 տարի առաջ: ԱՄՆ-ի Ատլանտա քաղաքում հայ ըմբիշ Արմեն Նազարյանին հաջողվեց նվաճել օլիմպիական ոսկի: Լիահույս ենք, որ այս տարի մեր պատվիրակությունը 20-ամյա ընդմիջումից հետո Հայաստան կվերադառնա ոսկե ավարով:
