ԱՇԽԱՐՀՆ ԱՆՑԱԾ ՇԱԲԱԹ
Միջազգային հանրությունն անցած շաբաթ ևս ուշի-ուշով հետևում էր ՊՊԾ գնդի գրավումից հետո Երևանում ստեղծված արտառոց իրավիճակին: Շուրջ երկու շաբաթ շարունակվող լարված իրադարձությունների հանգուցալուծմանը շատերն էին սպասում: Ոստիկանների և ցուցարարների «ջրերը» , ինչպես ասում են, նույն առվով չհոսեցին: Օրենքի պահապանների կողմից քաղաքացիների հանդեպ կիրառված անհամաչափ գործողությունները տարատեսակ մեկնաբանությունների տեղիք տվեցին: Նախ ԱՄՆ-ն, ապա նաև ԵՄ-ն խստորեն դատապարտեցին մարդու և քաղաքացիական իրավունքների խախտման դեպքերն ու լրագրողների նկատմամբ կիրառված, ծավալային առումով աննախադեպ բռնությունները: Նրանք ողջունեցին և միացան ՄԻՊ Արման Թաթոյանի հայտարարություններին: Անդրադառնալով մարդու և քաղաքացու իրավունքների կոպիտ խախտման դեպքերին, օմբուդսմենը հանդես եկավ ծառայողական քննություններ վարելու իշխանություններին ուղղված կոչով: Իսկ երբ ազատ արձակվեց «Ասպարեզ» ակումբի ղեկավար Լևոն Բարսեղյանը, ՀՀ-ում ԱՄՆ դեսպան Ռիչարդ Միլսն անձամբ գնաց նրան տեսակցության:
Շաբաթ օրը ԱԱԾ-ն ներկայացրեց վերջնագիր, ըստ որի ցուցարարների գործողությունների դադարեցման ողջամիտ ժամանակահատված սահմանվեց շաբաթ օրը, ժամը 17: 00-ը: Նշված ժամանակը սպառվեց, սակայն ուժայինները չդիմեցին գրոհի: «Սասնա ծռերին» աջակցող ցուցարարները ևս զսպվածություն ցուցաբերեցին: Չգնալով բախման, նրանք խաղաղ երթ անցկացրին Երևանի փողոցներում: Իսկ արդեն երեկոյան՝ Բաղրամյան պողոտայում հաջողվեց կանխել նաև ցուցարարներից մեկի ինքնահրկիզման փորձը: Եվրամիությունը, ԵԱՀԿ-ն և միջազգային մի շարք կազմակերպություններ իշխանություններին և ցուցարարներին հորդորեցին զերծ մնալ բռնություններից և հարցերը կարգավորել երկխոսությամբ: Կիրակի վաղ առավոտյան, օգտվելով զինյալների քնած լինելու հանգամանքից, պատանդառված բուժաշխատողները կարողացան աննկատ դուրս գալ ՊՊԾ գնդի տարածքից: Որոշ ժամանակ անց իրենց առաքելությունը համարելով ավարտված՝ երկխոսության կոչով հանդես եկավ «Սասնա ծռեր» խմբավորման ղեկավար Վարուժան Ավետիսյանը: Ըստ էության լարվածության հանգուցալուծումը երկխոսությամբ՝ թե՛ զինյալների, թե՛ իշխանությունների, թե՛ միջազգային կառույցների համար գտնված միակ «ոսկե միջինն» էր:
***
Իսկ նույն այդ ընթացքում աշխարհում մի շարք հիշարժան իրադարձություններ տեղի ունեցան: Հիլարի Քլինթոնն անցած շաբաթ պաշտոնապես առաջադրվեց ԱՄՆ նախագահի թեկնածու՝ Դեմոկրատական կուսակցությունից: Համապատասխան որոշումն ընդունվեց Ֆիլադելֆիայում՝ Դեմոկրատական կուսակցության համագումարում: Այսպիսով, ԱՄՆ պատմության մեջ առաջին անգամ նախագահի պաշտոնին առաջադրվեց կին թեկնածու: Նախագահ Օբաման գովեստի անսպառ խոսքեր շռայլեց Հիլարիի հասցեին, նշելով, որ նա բոլորից լավ կարող է ղեկավարել երկիրը:
Հուլիսի 29-ին Քլինթոնը ծրագրային ելույթ ունեցավ ԱՄՆ դեմոկրատների համագումարում: Ամերիկացիների շուրջ 71%-ը դրական ընկալեցին Հիլարի Քլինթոնի ելույթը: Համեմատության համար նշենք, որ Դոնալդ Թրմափի ելույթին դրական էր արձագանքել ամերիկացիների 57%-ը: Հարցվածների 82%-ը վստահ են Քլինթոնի ղեկավարման կարողությունների հարցում, իսկ Թրամփի առաջնորդության ներուժին հավատում է բնակչության 73%-ը: Ընդ որում, հարցվածների 60%-ը նշել են, որ ավելի հակված են աջակցելու Քլինթոնին: Հիշեցնենք, որ ԱՄՆ-ում նախագահական ընտրությունները նշանակված են նոյեմբերի 8-ին:
***
Հուլիսի 26-31-ը Լեհաստանի Կրակով քաղաքում «Կաթոլիկ երիտասարդության համաշխարհային օրեր»-ի շրջանակում կազմակերպված բացօթյա պատարագից առաջ Հռոմի Ֆրանցիսկոս պապը հանկարծակի ուշագնաց է եղել: Այդուհանդերձ, արագ ուշքի գալով, Պապը ելույթ է ունեցել 185 երկրից ժամանած մոտ 2 մլն հավատացյալների առաջ: Թե ինչն եղել Հռոմի պապի ուշագնացության պատճառը, այդպես էլ պարզ չի դարձել: