Թուրքիայում կբացվի Վանի թագավորության թանգարան
Թուրքիայի ներկայիս տարածքում գտնվող Վան քաղաքում ապրիլին նախատեսվում է բացել Վանի թագավորության պատմությանը նվիրված թանգարան: 54.000 քմ տարածք զբաղեցնող, շուրջ 100.000 պատմական նմուշ պարունակող թանգարանի շինարարությունը ֆինանսավորվել է Թուրքիայի մշակույթի նախարարության կողմից և կազմել ավելի քան 263.000 ԱՄՆ դոլար: Թանգարանի համար երկար ժամանակ նմուշներ են հավաքել շրջակա տարածքներից: Վանի պատմական նշանակության կառույցների ու վայրերի ծանոթագրության մեջ թուրք հեղինակները մեծ մասամբ խուսափում են տեղանքի հայկական անցյալի մասին հիշատակումներից:
Դինքի սպանության գործով երկու մեղադրյալ ազատ են արձակվել
Թուրքական դատարանը՝ «Ակօս» պարբերականի հիմնադիր Հրանտ Դինքի սպանության գործով երկու մեղադրյալի ազատ արձակման որոշում է կայացրել: Վերջիններս մեղադրվում էին սպանության նախապատրաստման մասին տեղեկությունը ստանալուց հետո կանխարգելիչ անհրաժեշտ միջոցառումների ձեռնարկմանը չնպաստելու համար: Մեղադրյալները չընդունելով իրենց մեղքը հայտարարել էին, որ տեղեկությունը հասել է ղեկավարությանը, իսկ անվտանգության միջոցառումների ձեռնարկումն էլ իրենց իրավասությունների մեջ չի մտել: Հրանտ Դինքը սպանվել է 2007թվականի հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից:
Երկվորյակության շահեկանությունը …
Պերուում իրավապահները ձերբակալել են մեկ տարի առաջ բանտից փախած Ալեքսանդր Դելգադո Հերերային: Դելգադոն դատապարտվել էր 16 տարվա ազատազրկման՝ երեխայի նկատմամբ սեռական ոտնձգություն կատարելու և կողոպուտ իրականացնելու մեղադրանքով: Ձերբակալվելուց հետո Հերերան պատմել է, որ հագուստը փոխելու միջոցով փախուստի հնարամիտ ծրագիր է մշակել ու իրականացրել երկվորյակ եղբոր՝ Ջանկառլոյի տեսակցության գալուց հետո:
Վերաքննիչ դատարանը հակասահմանադրական է ճանաչել Թրամփի միգրացիոն համաձայնագիրը
ԱՄՆ Վիրջինիա նահանգի Վերաքննիչ դատարանը կայացրած որոշմամբ հակասահմանադրական է հայտարարել ԱՄՆ նախագահ Դոնալդ Թրամփի միգրացիոն հրամանագրի վերջին տարբերակը: Դատարանի ներկայացուցիչները հայտարարել են, որ վերոնշյալ հրամանագիրը խտրականություն է կիրառում մուսուլմանների նկատմամբ՝ հակասելով ԱՄՆ Սահմանադրության դրույթներին: Սա Վերաքննիչ դատարանի կողմից ամերիկյան ղեկավարության ներկայացրած միգրացիոն հրամանագրի վերաբերյալ նման որոշման կայացման երկրորդ դեպքն է:
Վենեսուելայի ազգային արժույթը վերածվում է արվեստի ինքնատիպ գործերի
Նավթի պաշարներով հարուստ Վենեսուելային պատուհասած ֆինանսատնտեսական կոլապսը շարունակվում է: Տնտեսական ճգնաժամի պայմաններում, երբ երկրի ազգային արժույթի՝ բոլիվարի արժեզրկումը հասել է 13.000%-ի, արտարժույթի առքուվաճառքով զբաղվող վենեսուելացիները սկսել են տեղական թղթադրամներով զամբյուղներ, պայուսակներ ու այլ իրեր հյուսել: Ստեղծված իրավիճակում որոշ վենեսուելացիներ որոշել են թղթադրամները թափելու փոխարեն վերածել արվեստի ինքնատիպ գործերի: Թղթադրամներից հյուսված պայուսակներն, օրինակ, վաճառվում են 300.000 բոլիվարով, ինչը բավական է մեկ կգ միս գնելու համար:
Գերմանիայում առաջարկել են հասարակական տրանսպորտն անվճար դարձնել
Գերմանիայի կառավարությունն առաջարկում է անվճար դարձնել հասարակական տրանսպորտով երթևեկությունը: Շրջակա միջավայրի նախարար Բարբարա Հենդրիքսը, գյուղնախարարի և դաշնային կանցլերի գերատեսչության ղեկավարի հետ նամակ են հղել շրջակա միջավայրի հարցերով եվրահանձնակատարին՝ առաջարկելով չեղարկել հասարակական տրանսպորտի ուղեվարձը Գերմանիայի քաղաքներում: Իբրև հիմնավորում նշվում է, որ դա կարող է նպաստել, որ քաղաքացիներն ավելի հաճախ օգտվեն տրանսպորտից և քիչ երթևեկեն մեքենայով, ինչն իր հերթին կհանգեցնի վնասակար արտանետումների պարունակության նվազեցմանը մթնոլորտում: Հիշեցնենք, որ արտանետումների մակարդակը խախտելու համար Եվրահանձնաժողովը մտադիր է տուգանել Գերմանիային և ևս 8 երկրի:
Սուսինա Խաչատրյան