ԺՈՂՈՎՐԴԱՎԱՐՈՒԹՅԱՆ ՄՈՏԱԿԱ ԵՎ ՀԵՌԱԿԱ ՍԱՀՄԱՆԸ
Ժողովրդավարությունը հաճախ տարբեր բանաձևումներ է ունենում, ինչից նրա էությունն ամենևին էլ չի փոխվում: Ինձ համար, օրինակ, այն առաջին հերթին կառավարման թափանցիկությունն է ու ժողովրդի մասնակցությունն այդ կառավարմանը՝ սկսած սեփական քվեի տնօրինումից: Պակաս կարևոր չէ նաև արտահայտվելու, կամքի ազատությունը: Ի՞նչ ունենք և ինչ չունե՞նք Հայաստանում: Փորձենք հասկանալ:
Հայաստանում այսօր շատերն են բողոքում ժողովրդավարության բացակայությունից: Այդ առնչությամբ վկայաբերվում են բազմաթիվ իրական, ծանրակշիռ, կամ անէական փաստարկներ: Ես էլ համաձայն եմ, որ իրական ժողովրդավարության հասնելու համար Հայաստանը դեռևս անցնելիք ճանապարհ ունի, սակայն միանշանակ ձեռքբերումներն էլ ակնառու են: Սերնդափոխության հաշվին, թեկուզև դանդաղ, փոխվում է մարդկանց գիտակցությունը, պետական կառավարման հոգեբանությունը:
Մի բան ինձ համար առավել քան տեսանելի է: Հայաստանում ազատ կամարտահայտության լայն հարթակ կա. դա զանգվածային լրատվամիջոցներն ու սոցցանցերն են: Հենց այս հարթակներում օրինակ, հաճախ անխնա քննադատություն է հնչում երկրի առաջին դեմքերի հասցեին և ոչ ոք օրինակ, դրա համար չի ձերբակալվում: Սա, իհարկե, դարի նվաճումը չէ, սակայն առաջընթաց է և պետք է առողջ հարթակ դառնա հաջորդ քայլերի համար: Երևի թե շատերն են տեղյակ, թե սոցկայքերի, ընդհանրապես համացանցային ինչպիսի սահմանափակումներ կան տնտեսապես զարգացած որոշ երկրներում: Իրանն ու Չինաստանը դրա վառ օրինակն են:
Եկեք թռուցիկ մի հայացք նետենք իրապես ոչ ժողովրդավար երկրներին (Իրան, Հյուսիսային Կորեա, Սաուդյան Արաբիա, Ադրբեջան և այլն): Ամենևին ոչ այն նպատակով, որ նրանց համեմատ Հայաստանը շահեկան դիրքերում է, այլ որ՝ լավ հիմք ունենք առաջ գնալու, ավելիին հասնելու համար:
Հայաստանում այդ ճանապարհով առաջ շարժվելու շատ կարևոր մեկ այլ հնարավորություն ևս կա: Դրանք ընտրություններն են:
Շատերը կասեն՝ դրանք կանխորոշված են, կեղծիքները շատ են: Իրականում լույսի պես արդար ընտրության անցկացման հնարավորությունը յուրաքանչյուր քաղաքացու ակտիվ դիրքորոշման մեջ է, քվեարկության գնալու մեջ է: Այս մասին ես շատ եմ խոսել և այսօր միայն կարող եմ ավելացնել՝ 2017թ. խորհրդարանական ընտրությունն անչափ կարևոր է: Կարելի է ասել այն միաժամանակ նաև հաջորդ Նախագահի, վարչապետի ու երկրի քաղաքական ու տնտեսական կուրսի ընտրությունն է: Իսկ սա նշանակում է, որ յուրաքանչյուր մարդ պետք է գիտակցված ընտրություն կատարի, գնա իր ընտրության ետևից ու տեր կանգնի իր ընտրությանը:
Սա Հյուսիսային Կորեան չէ, որտեղ արգելված են սոցցանցերը, որտեղ չես կարող ինքդ որոշել՝ ինչ խոսել, անգամ՝ լսել ու կրել: Որտեղ մարդիկ կյանքը պահպանելու համար սպանում են երազանքները, ստիպողաբար հարմարվում ընդունված նորմերին ու փորձում մտքում անգամ ցածրաձայն երազել ապագայի մասին: Որտեղից փախչում են հարևան երկրներ՝ փորձելով մոռանալ, որ հայրենիքը տրորել է իրենց ապագան: Ցանկացողները դրանում կարող են համոզվել համացանցում դիտելով սեփական երկրից մազապուրծ այլ երկրում հայտնված փոքրիկ կորեուհու սրտաճմլիկ տեսանյութը: Հիմա մենք ոչ միայն կարող ենք բարձրաձայն երազել, այլև կարող ենք ընտրել մեր ապագան:
Մենք համեմատությունից սովորելու հնարավորություն և մեզ ներկայացած հնարավորություններն օգտագործելու կարիք ունենք: Եթե մեր ընտրական համակարգը մեզ չի գոհացնում ու չենք ուզում օգտվել ժողովրդավարության ծիլերից, ապա շինծու ժողովրդավարություն խաղացող հարևան Ադրբեջանի խեղկատակություններին ի՞նչ անուն տանք: Մեր հնարավորություններն իրապես զարգացման պիտի տանեն Հայաստանը, միայն թե չնահանջենք ու չհամարենք, թե ունենք այն, ինչ ունենք: Խելացի օգտագործենք քվեարկելու հնարավորությունը, սրանով է ամրանում ժողովրդավարությունը:
Սիրով՝ ձեր Արիանա