Օրեր առաջ մեր քաղաքի բնակիչները զարմանքով հետևում էին, թե ինչպես մի խումբ ջահելներ ու ահելներ` «Ճամփորդի» շապիկներով փողոցնում անվճար բաժանում էին մեր շաբաթաթերթը: Իրականում դա «Ճամփորդի» հերթական սոցիալական ակցիան էր, որին միացել էին բազմաթիվ սփյուռքահայ և օտարերկրացի կամավորներ տարբեր կազմակերպություններից` Birthright Armenia, School of Public Diplomacy, American University of Armenia: «Ճամփորդի» մեծ թիմը` թերթի գլխավոր խմբագիր և հիմնադիր Արիանա Կաոիլիի գլխավորությամբ, շրջեց քաղաքով մեկ: Եղան տարբեր հաճելի պահեր, երբ մարդիկ ճանաչում, ժպիտով մոտենում էին ու շնորհակալություն հայտնում թերթի գոյության համար: Այն բանի համար, որ  «Ճամփորդը» հնարավորություն է ընձեռում մարդկանց ձեռքը պահել մեր քաղաքի զարկերակի վրա: Արկածները ևս անպակաս էին. Երևանի մետրոյում Ֆրանսիայից եկած ու մեզ միացած  գեղեցկուհի կամավորը մոլորվեց ու կորցրեց մեզ: Մեծ էր մեր ուրախությունը, երբ բարի մարդիկ գտան ու հետ վերադարձրին «Ճամփորդին» հմայիչ ֆրանսուհուն, ով անմիջական ժպիտով մոտենում էր անցորդներին ու հայերեն ասում` Տերտ ուզո՞ւմ ես:

Հիշեցնենք, որ «Ճամփորդը» կովկասյան տարածաշրջանում առաջին անվճար թերթն է: Հանրային տրանսպորտում ունի Երևանի քաղաքապետարանի կողմից շնորհված բացառիկության կարգավիճակ: Անվճար տարածվում է հանրային տրանսպորտի միջոցներում: «Ճամփորդն» ունի օրական առնվազն 50.000 ընթերցող: «Ճամփորդի» արկղերը տեղադրված են հանրային տրանսպորտի գրեթե բոլոր միջոցներում՝ մանուշակագույն և դեղին ավտոբուսներում, տրոլեյբուսներում, միջքաղաքային երթուղիները սպասարկող միկրոավտոբուսներում, խոշոր տաքսի ծառայությունների մեքենաներում: Իսկ վերջերս նաև Armenia ավիաըներության օդանավերում:

Երևանցիներին այնքան դուր եկավ այս սոցիալական, որ «Ճամփորդի» թիմը որոշեց այն շարունակական դարձնել: Դե ինչ, փնտրեք մեզ ոչ միայն Երևանի տրանսպորտում, այլ նաև մեր քաղաքի փողոցներում: