7 ՀԱՐՑ. ՍԵՐՈԲ ԽԱՉԱՏՐՅԱՆ
ԵՊՀ փիլիսոփայության պատմության ամբիոնի և ԵՊԼՀ կրթության կառավարման և պալանավորման ամբիոնի դասախոս: Կրթության փորձագետ:
– Ի՞նչ արժեք (կառույց, ավանդույթ կամ մեկ այլ բան) կուզեիք «հայաֆիկացնել»: – Մենք՝ հայերս, շատ իմպուլսիվ ենք։ Հաճախ քայլն անում ենք, հետո միայն մտածում հետևանքների մասին։ Կուզենայի արևելյան մշակույթի՝ դեպի ներս նայելու արժեքը «հայաֆիկացնել»:
– Եթե Դուք լինեիք Երևանի քաղաքապետը, ո՞րը կլիներ ձեր առաջին հանձնարարականը: – Երևանն ընդգրկել ՅՈՒՆԵՍԿՕ-ի Սովորող քաղաքների միջազգային ցանցում։ Այդ ցանցը միավորում է այն քաղաքները, որոնք կարևորում են ամբողջ կյանքի ընթացքում սովորելու միջավայրի ստեղծումը, քաղաքների միջև փորձի փոխանակումը։
– Թվարկեք երեք քայլ, որոնք կնպաստեին հայրենադարձությանը:– Արդար կառավարում, պրոֆեսիոնալիզմի կարևորում, ոգևորող և համախմբող ղեկավարներ։
-Հայոց պատմության ողջ ժամանակահատվածի 3 ամենալուսավոր կերպարները՝ Ձեր դիտարկմամբ: – Մեսրոպ Մաշտոց, Արամ Մանուկյան,Հովհաննես Թումանյան:
-Հայոց պատմության ո՞ր էջը կսրբագրեիք:– Վերջին 20 տարիները։ Շատ կարևոր է, որ նորաստեղծ պետության հիմքում դրվեն գաղափարներ, արժեքներ։ Կուզենայի, որ Հայաստանում գաղափարների բախում լիներ։ Պարզապես ալիքների հոսքին տրվելով չես կարող ուժեղ պետություն կառուցել։
– Ե՞րբ և ի՞նչն է վերջին անգամ Ձեզ զարմացրել: – Վերջին անգամ ինձ զարմացրել է հեռախոս լիցքավորող անշարժ հեծանիվը։ Պտտում ես սեղմակները և հեռախոսդ լիցքավորվում է։ Ե՛վ ֆիզիկական վարժություն ես կատարում, և՛ հեռախոսդ է լիցքավորվում։ Երկուսը՝ մեկում։
– Արդյունքի, հաղթանակի հասնելու Ձեր բաղադրատոմսը:– Պատրաստ լինել տևական ճանապարհ անցնելու։ Անընդհատ ջանքեր գործադրել։ Ձախողումների պատճառը փնտրել քո ներսում։ Սովորել քեզանից տարբերվող մարդկանցից։ Մտածել ճկուն և բաց։ Իմաստ դնել արածիդ մեջ։
