7 ՀԱՐՑ. ՀԱԿՈԲ ՊԱՊԻԿՅԱՆ ԿԱՄ ՊԱՐԶԱՊԵՍ ԺԱԿ
Սիրված և ճանաչված հեռուստառադիոհաղորդավար: 1998 թվականից ի վեր նրա մտապահվող ձայնը հնչում է հայկական ռադիոալիքներով: 2000 թվականից աշխատում է «Ռադիո Վան» ռադիոկայանում: Ներկա պահին «Երկիր Մեդիա» հեռուստաընկերության «Բարև Երկիր» տեղեկատվական-ժամանցային ծրագրի պրոդյուսերն ու վարողն է:
– Ո՞րն է Ձեր նախընտրած մարզաձևը: – Սիրում եմ դիտել ֆուտբոլ։ Գենետիկորեն Հայաստանի ընտրանու երկրպագուն եմ ։ Նախընտրում եմ դիտել նաև Իսպանիայի և Ֆրանսիայի հավաքականների խաղերը։ Սիրելի ակումբը «Ռեալ Մադրիդն» է։ Իսկ զբաղվելու համար՝ լավագույնը լողն է։
– Ո՞րն է Ձեր սիրելի ավտոմեքենան, վարո՞ւմ եք: – Այո, վարում եմ։ Կյանքում երկու ավտոմեքենա եմ վարել, և երկուսն էլ ճակատագրի բերումով նույն մակնիշի՝ «Volkswagen Jetta» են եղել: Անգամ գույնն է նույնը, պարզապես երկրորդ մեքենան՝ 10 տարով երիտասարդ ու ավելի բազմաֆունկցիոնալ է։ Եվրոպական «կիրթ», փոքր մեքենա է՝ հզոր շարժիչով։ Իմ բնավորությանը մոտ է, պրակտիկ է և շարժունակ:
– Ձեր նախընտրած բույրը:– Վաղ առավոտյան տանը տարածվող նոր պատրաստված խնձորով թխվածքի բույրը։ Ինչպես նաև՝ բակից հավաքված ծիրանից պատրաստվող պահածոյի բույրը։
– Ձեր նախընտրած ձայնը:– Փոքրիկ աղբյուրից հոսող ջրի ձայնը։
– Ինչի՞ց եք ամենաշատը վախենում: – Կյանքի հանդեպ հետաքրքրությունը կորցնելուց ։
– Եթե հանկարծ հրդեհ բռնկվեր, և Դուք հնարավորություն ունենայիք տանից միայն մեկ իր փրկել, ի՞նչը կընտրեիք: – Շանս և թութակին։
– Եթե ընդամենը երեք հանրահայտ մարդու ճաշի հրավիրելու հնարավորություն ունենայիք, ովքե՞ր կլինեին Ձեր ընկերակիցները: – Կուզեի հյուրընկալել Մահաթմա Գանդիին, Շառլ Ազնավուրին և Սոս Սարգսյանին։