2017 թվականի հոկտեմբերի 10-11-ը Հայաստանի Հանրապետության պետական կառավարման ակադեմիան «Հումանիտար հետազոտությունների կենտրոն» ծրագրի շրջանակում («Կառավարչական գործունեության հոգեբանություն» գիտահետազոտական լաբորատորիա, «Տարածաշրջանային հետազոտությունների կենտրոն», «Գիտության կառավարման հետազոտական կենտրոն») կազմակերպեց միջազգային գիտաժողով «Կառավարման ժամանակակից հիմնախնդիրներ» թեմայով:

Գիտաժողովի նպատակն էր՝ քննարկել ժամանակակից կառավարման հիմնախնդիրները և դրանց հնարավոր լուծումները, ներկայացնել գիտական հետազոտություններ, բացահայտել ձևափոխվող հասարակությունում կառավարման ժամանակակից մարտահրավերները և դրանց լուծման հեռանկարները:

Գիտաժողովին մասնակցում էին հայաստանյան և այլ երկրների ներկայացուցիչներ, մասնավորապես՝ Ռուսաստանի գիտությունների ակադեմիայի, Սանկտ-Պետերբուրգի պետական համալսարանի, Սամարայի պետական սոցիալ-մանկավարժական համալսարանի, Ուդմուրտիայի պետական համալսարանի, Բելգորոդի պետական ազգային հետազոտական համալսարանի դոկտորներ, պրոֆեսորներ:

Բացման խոսքով հանդես եկավ ՀՀ պետական կառավարման ակադեմիայի ռեկտոր Արսեն Լոքյանը, ՀՀ կրթության և գիտության նախարար Լևոն Մկրտչյանը, ՀՀ ԿԳՆ գիտության պետական կոմիտեի նախագահ Սամվել Հարությունյանը: