ՀԱՆՐԱՅԻՆԻ ՈՒ ՔԱՂԱՔԱԿԱՆԻ ՄԱՍԻՆ
Հայաստանում պայծառ աշուն է, քաղաքական ուժերի համար՝ թեժ ու նախընտրական: Մի քանի ամսից երկիրը նոր խորհրդարան կընտրի, որն էլ նորացված Սահմանադրության համաձայն քաղաքական նոր մշակույթով կառաջնորդվի, երկիրն էլ կիսանախագահականից կանցնի խորհրդարանական կառավարման: Մոտենում են ընտրությունները, ենթադրաբար՝ «Ճամփորդն» էլ չի կարող գործընթացների անտարբեր դիտորդը լինել:
Մեր թերթի գոյության ընթացքում ընթերցողի հետ մշտապես անկեղծ ենք եղել և հստակ ներկայացրել մեր դիրքորոշումը հասարակությանը հուզող հարցերի նկատմամբ: Եվ այսօր, երբ մեր 41-երորդ հանդիպումն է, կարող ենք ավելի վստահ ասել, որ արդեն մեծ ենք ու կարող ենք խոսել քաղաքականության մասին՝ առանց քաղաքականության մասին բարձրաձայնելու: Քառասունմեկում հանրային քաղաքականության մասին ենք խոսում:
Իսկ ինչպես խոսել քաղաքականության մասին՝ առանց նրանից խոսելու: «Ճամփորդը» գտել է այդ ձևը. մեզ առաջնահերթ չեն հետաքրքրում մարդկանց քաղաքական հայացքները, առանձին գործիչներ, առանձին քաղաքական կերպարներ, դեպքեր ու դեմքեր: Մեզ հետաքրքրողը հանրային քաղաքականությունն է, որի մեջ տարրալուծված, մարսված ու ձևավորված են քաղաքական տանիքի տակ հանդես եկող ամեն անձ ու իրադարձություն: Այս տրամաբանությամբ ետին պլան են մղվում նույն կարգախոսները տարբեր կերպ արտասանող լիդերները, տարբեր անուններով նույն գաղափարախոսությանը հարող ուժերը, նրանց ծրագրերն ու քայլերը: Մեզ հետաքրքրում են ամբողջական երևույթները. բոլոր այն կարգավորումները, գործիքները, որոնցով իրականացվում է հանրային քաղաքականությունը:
Հանրային քաղաքականությունը հենց հասարակության թելադրած օրակարգն է, որին պիտի ականջալուր լինեն քաղաքական ուժերը, եթե ցանկանում են հաջողել: Մենք պիտի քննարկենք բոլոր այն օրենքներն ու դրանցից բխող քայլերը, որոնք անմիջական ազդեցություն ունեն մարդկանց վրա:
Ինչ են բերում իրենց հետ օրենսդրական բարեփոխումները, ինչ տնտեսական հետևանքներ են առաջ գալիս, որ օրենքներն են արժանի հասարակական քննարկման ու հանրային կամարտահայտության կարիք ունեն: Այս հռետորական հարցադրումները խորքային շերտեր ունեն և մենք պատրաստ ենք ձեզ հետ միասին բացահայտել դրանք:
Մենք միշտ քննարկման մեջ ենք լինելու, մենք այդ ճանապարհով ենք գնալու ու տեղ հասնելու. դա մեր աշխատաոճն է, մենք ձգտում ենք բազմակարծության: Պետք է շարունակենք խոսել այն ամենի մասին, ինչ կատարվում է մեր շուրջը, ինչն ազդում է մեզ վրա, ինչից մենք ենք շահողն ու տուժողը:
Պիտի քննարկենք, խոսենք, երկխոսությունն այլընտրանք չունի: Հին խոսք կա՝ «ճշմարտությունը ծնվում է բանավեճում»: «Ճամփորդը» այս գործընթացի մի մասը կդառնա՝ այն իրականացնելով առողջ ձևով: Քաղաքականությունը տարբերվում է հանրային քաղաքականությունից, որովհետև առաջինը վերաբերում է լիդերներին, դեմքերին, իսկ մենք հասարակության մասին ու համար ենք: Հիմա մեր քաղաքական բանավեճը շատ ցածր մակարդակի է, հաճախ միմյանց մեղադրելուց այն կողմ՝ սանդղակը չի հասնում ավելի քաղաքակիրթ հարթակի: Մենք բարձրացնում ենք մեզ՝ միայն ուրիշներին նսեմացնելով, ինչն ակնհայտ սխալ է: Իրականում մենք ոչ թե անհատի, այլ գաղափարների, մոտիվացիայի կողմնակից ու կրող ենք ցանկանում լինել ու այդ մտածելակերպով վարակել նաև դիմացիններին:
Ինչպես խոսել ու գործել հանրային քաղաքականության ասպարեզում՝ խելամիտ ու արդյունավետ ճանապարհով, եկեք փորձենք:
Սիրով ձեր՝ Արիանա