FATATO. ՁԵՐ ԿԱԽԱՐԴԱԿԱՆ ՏՆԱԿԸ
– Երկու տարի առաջ Մարիամի ծնունդն էր: Ուզում էի այնպիսի նվեր անել, որ և՛ տարբերվող լիներ և՛ արտահայտեր այն ողջ ջերմությունը, որ զգում էի նրա նկատմամբ: Այդպես պատրաստեցի առաջին Ֆատատոն՝ կերամիկայից ու վիտրաժային ապակիներից տնակը,- ասում է 28-ամյա Էռնեստ Ոսկանյանը:
-Տնակը շատ հեքիաթային ու լուսավոր էր: Երբ այն տեսա, շատ հավանեցի: Այն ինձ կախարդական տուն հիշեցրեց՝ լուսավոր, գունագեղ ապակիներով,- ասում է Էռնեստի սիրելին՝ Մարիամ Հակոբյանը:
Առաջին Ֆատատոն ճակատագրական նշանակություն է ունեցել. հենց այս անակնկալից հետո են Մարիամ ու Էռնեստը սկսել հանդիպել, ժամանակ անց էլ որոշել կախարդական տնակները բիզնեսի վերածել:
– Մասնագիտությամբ մարկետոլոգ եմ, տնակը տեսնելով՝ հասկացա, որ կոմերցիոն առումով այն մեծ պոտենցիալ ունի, և որ շատերը կցանկանան ունենալ իրենց կախարդական տնակը: Որոշեցինք կախարդական տնակներն այդպես էլ կոչել՝ «Ֆատատո», որ իտալերենից թարգմանաբար նշանակում է կախարդական աշխարհ: Անվանումն ընտրելուց հետո անցանք գործի: Էռնեստը զբաղվում է ֆատատոների պատրաստմամբ և դիզայնի հարցերով: Մարկետինգային քայլերի մշակմամբ, վաճառքով ես եմ զբաղվում,-նշում է Մարիամը: Առաջին ֆատատոները լուսավոր տնակի ձևով էին, հետագայում ստեղծվեցին նաև ժամացույցի, տարոսիկի, սառնարանի մագնիսի նմանությամբ ֆատատոներ: Աշխատանքը կատարվում է բացառապես ձեռքով: Ստեղծված յուրաքանչյուր ֆատատո օրիգինալ է և չկրկնվող:
– Ինչպես յուրաքանչյուր մարդ անհատականություն է ու տարբերվող, այնպես էլ ցանկացած ֆատատոն է յուրահատուկ ու չկրկնվող,- ասում է Մարիամը:
Կախարդական տնակները կարելի է ձեռք բերել Գաֆեսճյան արվեստի կենտրոնից կամ պատվիրել Ֆեյսբուքյան էջի միջոցով:
Տաթևիկ Սարգսյան