7 ՀԱՐՑ. ԳՈՀԱՐ ՀԱՐՈՒԹՅՈՒՆՅԱՆ
Միսս Հայաստան 1998», «Միսս ԱՊՀ 1999» և «Միսիս գլոբ 2009» տիտղոսները կրող գեղեցկուհին ներկա պահին զբաղվում է երեք անչափահաս երեխաների դաստիարակությամբ: Ամուսնուն օգնում է ընտանեկան բիզնեսում, իսկ ընդհանրապես, մտադիր է շարունակել երիտասարդ տարիների հիմնական զբաղմունքը՝ նկարչությունը:
– Ո՞րն է Ձեր նախընտրած մարզաձևը, ինչո՞ւ:
– Նախընտրելի մարզաձև չունեմ: Յոգայով եմ զբաղվում: Սիրում եմ դիտել գեղասահքի և մարմնամարզության մրցույթներ:
– Ո՞րն է Ձեր նախընտրած օծանելիքը, ինչո՞ւ:
– Երեխաներս ալերգիա ունեն, այդ իսկ պատճառով էլ խիստ սահմանափակել եմ օծանելիքի գործածումը: Նախընտրած օծանելիք չունեմ, չեմ հետևում ընդհանուր միտումներին:
– Ձեր նախընտրած բույրը:
– Բնության, ծաղկած ծառերի, ծաղիկների, ծովի բույրը:
– Ձեր նախընտրած ձայնը:
– Երեխաներիս ձայնը, ծիծաղը:
– Ինչի՞ց եք ամենաշատը վախենում:
– Մինչ ընտանիք կազմելը վախեր չունեի: Այժմ վախենում եմ հարազատներիս համար:
– Եթե հանկարծ հրդեհ բռնկվեր և Դուք հնարավորություն ունենայիք տանից միայն մեկ իր փրկել, ի՞նչը կընտրեիք:
– Մանկությանս տարիներին մեր տունն այրվել է, գիտեմ՝ ինչ սարսափելի բան է: Նման արհավիրքից հետո հեշտ վերականգնվելու համար կփորձեի դուրս բերել որևէ արժեքավոր իր:
– Եթե ընդամենը երեք հոգու ճաշի հրավիրելու հնարավորություն ունենայիք, ովքե՞ր կլինեին Ձեր սեղանակիցները:
– Երազում եմ ծանոթանալ Շառլ Ազնավուրի հետ: Հյուրերիս թվում կլինեին նաև Սերժ Թանկյանն ու Հենրիխ Մխիթարյանը: