7 ՀԱՐՑ. ԿԱՐԵՆ ՇԱՀԳԱԼԴՅԱՆ
Ջութակահար, Արամ Խաչատրյանի անվան եռյակի անդամ: Համերգներով հանդես է եկել բազմաթիվ երկրներում: 1998-2002 թթ. նվագել է Վլադիմիր Սպիվակովի ղեկավարած հանրահայտ «Մոսկվայի վիրտուոզներ» նվագախմբի կազմում: 2003-2004 և 2004-2005 թթ. համերգաշրջաններում որպես մենակատար ՌԴ-ում հանդես է եկել տարբեր նվագախմբերի հետ` նվագելով Ստրադիվարիուսի ջութակի վրա: Ներկա պահին պատրաստվում է օգոստոսին Երևանում կայանալիք համերգին:
– Ո՞րն է Ձեր նախընտրած մարզաձևը:
– Սիրում եմ թե՛ խաղալ, թե՛ դիտել ֆուտբոլ: Երկրպագում եմ Մոսկվայի «Սպարտակին» և իտալական «Միլանին»:
– Ո՞րն է Ձեր սիրելի ավտոմեքենան, մեքենա վարո՞ւմ եք:
– Երիտասարդ տարիքից վարում եմ, բայց սիրելի ավտոմեքենա չունեմ:
– Ձեր նախընտրած բույրը:
– Սիրում եմ խարույկի, որակյալ ծխախոտի բույրը:
– Ձեր նախընտրած ձայնը:
– Երաժշտական գործիքների ձայնը:
– Ինչի՞ց եք ամենաշատը վախենում:
– Վախենում եմ, որ ինչ-որ բան խանգարի իմ նպատակների իրագործմանը:
– Եթե հանկարծ հրդեհ պատահեր, և Դուք հնարավորություն ունենայիք տանից միայն մեկ իր փրկել, ի՞նչը կընտրեիք:
– Իմ ջութակը:
– Եթե ընդամենը երեք հանրահայտ մարդու ճաշի հրավիրելու հնարավորություն ունենայիք, ովքե՞ր կլինեին Ձեր ընկերակիցները:
– Յոհաննես Բրամսը, Ֆրենսիս Ֆորդ Կոպոլան և Իվան Տուրգենևը: