ԱՌԱՋԻՆ ՏԻՏՂՈՍԸ՝ ԼՐԱՑՈՒՑԻՉ ԺԱՄԱՆԱԿՈՒՄ
Հայաստանի ֆուտբոլի հավաքականի ավագ Հենրիխ Մխիթարյանը Դորտմունդի «Բորուսիայից» տեղափոխվելով «Մանչեսթեր Յունայթեդ», օգոստոսի 7-ին առաջին պաշտոնական հանդիպումն է անցկացրել և նվաճել առաջին մրցանակը: Մխիթարյանը մասնակցել է Պրեմիեր լիգայի չեմպիոն «Լեսթերի» և գավաթակիր «Մանչեսթեր Յունայթեդի» միջև անցկացված Անգլիայի սուպերգավաթի խաղին: Մանչեսթերյան ակումբին հաջողվել է 2:1 հաշվով հաղթանակ տոնել: 83-րդ րոպեին հաղթական գոլի հեղինակ է դարձել «Մանչեսթեր Յունայթեդ» վերադարձած Զլատան Իբրահիմովիչը: Եվ այսպես, մանկունյացիների կազմում Մխիթարյանը նվաճել է նոր մրցաշրջանի իր առաջին տիտղոսը: Հայ ֆուտբոլիստը չի եղել մեկնարկային կազմում և մասնակցել է խաղի միայն վերջնամասում՝ փոխարինման դուրս գալով մրցավարի կողմից ավելացրած լրացուցիչ ժամանակում: Նրա դիրքում առաջին րոպեներից գործել է ակումբի սան, 23-ամյա Ջեսի Լինգարդը: Հենց նա էլ 32-րդ րոպեին փայլուն անցումից հետո բացել է հանդիպման հաշիվը: Լինգարդին 63-րդ րոպեին փոխարինել է իսպանացի Խուան Մատան, որ նույնպես Մխիթարյանի հիմնական մրցակիցներից է: Մխիթարյանը խաղադաշտ է դուրս եկել՝ փոխարինելով հենց Մատային: Փոխարինման պահին Մատան ակնհայտորեն հուզված ու դժգոհ է եղել, խաղը շարունակելու պատրաստ որևէ ֆուտբոլիստ դրական չի վերաբերվում կրկնակի փոխարինմանը: Խաղավարտից հետո «Յունայթեդի» գլխավոր մարզիչ Ժոզե Մոուրինյոն մեկնաբանել է Մատայի փոխարինումը: Նա նշել է, որ հաղթական խաղի վերջին րոպեներին խնդիր ուներ խաղադաշտից դուրս բերել իր թիմի ամենացածրահասակ խաղացողին, ով չէր կարող պայքարել «երկրորդ հարկում»: Ինչևէ, արդեն իսկ ակնհայտ է, որ Մխիթարյանի համար հիմնական կազմում հայտնվելը այնքան էլ հեշտ չի լինելու: Նախորդ երկու ընկերական խաղերում ևս հայ ֆուտբոլիստը խաղը սկսել է որպես պահեստային: Ավելին, արդեն պաշտոնապես հաստատվել է,որ «Յուվենտուսի» երիտասարդ աստղ Պոլ Պոգբան նույնպես տեղափոխվում է «Մանչեսթեր Յունայթեդ»: Չհաստատված լուրերի համաձայն՝ անգլիական ակումբը նրա տրանսֆերի համար վճարել է շուրջ 100 միլիոն եվրո: Պոգբան, ինչպես Մխիթարյանը, կարող է խաղալ ենթահարձակվողի դիրքում: Անգլիայի սուպերգավաթի համար խաղում, որն ավարտվել է «Մանչեսթեր Յունայթեդի» հաղթանակով, գոլերի հեղինակ են դարձել՝ «Մանչեսթեր Յունայթեդ»-ից Ջեսի Լինգարդն (32) ու Զլատան Իբրահիմովիչ (83),«Լեսթեր» -ից Ջեյմի Վարդին (52):