ԿԱՅԱՑԱՎ «ՃԱՄՓՈՐԴ» ՀԻՄՆԱԴՐԱՄԻ ԱՌԱՋԻՆ ՍԵՄԻՆԱՐԸ (ՖՈՏՈ)
Լրագրության տնտեսական ուղղվածությունն աշխարհում արագ զարգացող ոլորտներից է: Ժողովրդավարական երկրներում ընդգծված կարևորությամբ են վերաբերվում տնտեսական զարգացումների և հանրային քաղաքականության ոլորտներին վերաբերող զգայուն տեղեկատվության ճշգրիտ ներկայացմանը: Հայաստանյան իրականությունում, սակայն, պատկերը փոքր-ինչ այլ է: Լրագրության այս ճյուղով քչերն են համարձակվում զբաղվել, շատերը փորձում են համատեղել այլ ուղղությունների հետ՝ երբեմն ներկայացնելով ոչ խորքային ուսումնասիրություններ:
Բարեբախտաբար, այս ամենի ֆոնին կան նաև տնտեսական ոլորտներն ու ենթակառուցվածքները լրջորեն լուսաբանող լրագրողներ: Տնտեսական լրագրության հետ կապված նոր գործիքակազմին, բաց և փակ աղբյուրներին, թվային տվյալների հետ աշխատանքի յուրահատկություններին ծանոթացնելու և լրագրողների արդեն ունեցած հմտությունները զարգացնելուն էր միտված «Հանրային քաղաքականություն և տնտեսագիտություն. Ինչպես ներկայացնել պարզ և արդյունավետ ձևով» թեմայով սեմինարը: Այն «Ճամփորդ» հասարակական հիմնադրամի լրագրողների հմտությունների զարգացմանն ուղղված պարբերական սեմինարներից առաջինն էր:
ՀՀ Տնտեսական զարգացման և ներդրումների նախարարության և Տնտեսական լրագրողների ակումբի աջակցությամբ «Բեստ Վեստերն Աղվերան» հյուրանոցում կազմակերպված երկօրյա սեմինարի շրջանակում զեկույցներով և մեկնաբանություններով հանդես եկան արտասահմանցի և հայաստանցի տնտեսագետներ, ոլորտում հմտացած լրագրողներ: Քննարկման ընթացքում նոր կառավարության տնտեսական քաղաքականությանն առանձին զեկույցով անդրադարձավ ՀՀ տնտեսական զարգացման և ներդրումների փոխնախարար Տիգրան Խաչատրյանը:
Սեմինարը գլխավորապես շեղվում էր նախանշված գրաֆիկից, քանի որ յուրաքանչյուր բանախոսի զեկույցը երկարում էր՝ բավական ակտիվ հարց ու պատասխանի պատճառով: Թեմաների քննարկումը հաճախ շարունակվում էր նաև կոնֆերանսի դահլիճից դուրս: Փորձառու և համեմատաբար անփորձ լրագրողները սեմինարի ընթացքում փոխանակվեցին իրենց փորձով ու գիտելիքով:
Սեմինարի ավարտին «Ճամփորդ» ֆոնդի հիմնադիր Արիաննե Կաոիլին նշեց, որ ֆոնդի արդյունավետ գործունեության արդյունքում նմանատիպ այլ միջոցառումներ էլ են նախատեսվում լրագրողների համար: Ավարտին է մոտենում լրագրողների համար կազմակերպված անգլերենի անվճար դասընթացների առաջին եռամսյակը և շուտով կտրվի նոր փուլի մեկնարկը:
Երկօրյա սեմինարի ձեռքբերումներն ամփոփեցին Տաթևիկ Սարգսյանն ու Արարատ Սահակյանը, լավագույն պահերը ֆիքսեց Գարեգին Ալեքսանյանը:
