ՎԱՆԱՁՈՐԻ ԱՎԵՐՎԱԾ ԳՈՐԾԱՐԱՆՆԵՐԸ. ՄԱՍ 1
Արդյունաբերական տուրիզմն ամբողջ աշխարհում զարգացող զբոսաշրջային ճյուղերից է: Գինեգործարաններից մինչև շոկոլադի արտադրամասեր, գորգագործական արհեստանոցներից մինչև մեքենաշինական գործարաններ՝ բոլորը բացում են իրենց դռները զբոսաշրջիկների առջև: Ավտոմատացված արտադրական պրոցեսները գրավում են հազարավոր զբոսաշրջիկների՝ ստիպելով անցնել քաղաքից քաղաք, երկրից երկիր՝ այս կամ այն արտադրական գործընթացին մասնակցելու համար:
Այս առումով Հայաստանը հսկայական ներուժ ունի՝ էքստրեմալ, էկոզբոսաշրջությանը զուգահեռ զարգացնելու նաև արդյունաբերական զբոսաշրջությունը: Թեպետ Երևանում որոշ ընկերություններ հյուրընկալում են զբոսաշրջիկներին ու շրջայց կազմակերպում նրանց համար, մարզերում դեռևս այդ ներուժը մնում է չօգտագործված:
Վանաձորի տարբեր թաղամասերով քայլելիս կարելի է հանդիպել կիսավեր շենքերի, տարբեր գործարանների «մնացորդների»: Տեղացիներից ու քաղաք այցելող զբոսաշրջիկներից շատերին հուզում են նույն հարցերը՝ ինչ շենքեր են դրանք, ինչ նպատակի են ծառայել, երբվանից և ինչու չեն գործում:
Այդ շենքերի պատմությունը քաղաքում ոչ բոլորը գիտեն: Եթե 50-անց վանաձորցիներից ոմանք կարող են ինչ-որ բան պատմել դրանց արդյունաբերական վառ անցյալի մասին, ապա երիտասարդների համար դրանք «պատմություն չունեցող շենքեր են»: Որոշեցինք շրջել Հայաստանի 3-րդ քաղաքում ու ծանոթանալ նախկին գործարանների անցած պատմությանն ու ներկա ճակատագրերին:
Առաջին կանգառը քաղաքի հին փողոցերից մեկում՝ Թումանյան փողոցում է. այստեղ է գտնվում նախկին ավտոգեն սարքերի, այժմյան «Ավտոգեն Մ» գործարանը, մորթու մուշտակի ֆաբրիկան, քաղաքի տաքսիների ավտոկայանատեղին, կամ ինչպես վանաձորցիներն են ասում՝ Տաքսոպարկը:
Ավտոգեն Մ գործարանը
Մորթու մուշտակի ֆաբրիկան
Քիչ ավելի ներքևում մսի կոմբինատն է: Այստեղ երկու և ավելի տասնամյակ է միս –մսամթերք չեն արտադրում, փոխարենը կառույցի ներսում բազմաթիվ փոքր գրասենյակներ են տեղակայվել: Բայց սա չի խանգարում, որ վանաձորցիները սովորույթի ուժով շենքն անվանեն մսի կոմբինատ:
Մսի կոմբինատ
Թումանյան փողոցից ճանապարվում ենք դեպի 3-րդ մաս կոչվող թաղամաս: Այստեղ ժամանակին մի քանի գործարաններ են եղել:
Առաջինն «Արտավտոմատիկա» գործարանն է: Այստեղ գտնվող, այսպես կոչված, «ռոբոտների» գործարանում արտադրված սարքերը ժամանակին օգտագործել են ռազմական ոլորտում:
Հաջորդը Ջերմաէլեկտրոկենտրոնն է, որը գործարկվել է 1962թ.-ին: Այն տաք ջուր ու գոլորշի է մատակարարել ամբողջ քաղաքին: Կենտրոնացված ջեռուցման միջոցով գործել են արդյունաբերական ձեռնարկություններ, ջեռուցվել բնակելի տներ ու բնակարաններ:
Ջերմաէլեկտրոկենտրոն
Ջերմաէլեկտրոկենտրոնից քիչ այն կողմ Քիմիական մանրաթելերի գործարանն է: Գործունեության լավագույն տարիներին տարեկան արտադրվել է շուրջ 14 տոննա մանրաթել, 7000 տոննա սիգարետային ֆիլտրի ժապավեն:
Ասում են՝ այստեղ արտադրված սոսինձն ու ներկանյութերը ժամանակին մեծ պահանջարկ ու լայն սպառում ունեին: 1987թ.-ին գործարանը տվել է 1950 տոննա տարաբնույթ արտադրանք: Այժմ գործարանը մասնավորցված է ու գործում է շատ փոքր ծավալներով:
Շարունակելի
Տաթևիկ Սարգսյան