ՏՈՆ, ՈՐԸ ՄԻՇՏ ՄԵԶ ՀԵՏ Է …
«Ճամփորդի» զրուցակիցն է Երևանի քաղաքապետի օգնական Մարիա Բարաղամյանը:
– Մայրաքաղաք Երևանը բոլորեց ծննդյան 2798 ամյակը: Ինչո՞վ տարբերվեց այս տարվա տոնը նախորդներից:
– Ամենաառաջինը՝ մշակութային միջոցառումների համար նախատեսված միջոցների խնայողությամբ: Երևանի քաղաքապետը դեռ մայիսին կայացած ավագանու նիստի ժամանակ հայտարարեց, որ մայրաքաղաքում անցկացվելիք մշակութային միջոցառումների համար 2016թ. նախատեսված ծախսերը կրճատվելու են: Եվ դա ուներ իր հիմնավորումը: Քառօրյա պատերազմից հետո Երևանի քաղաքապետարանը օգնություն տրամադրեց ու օժանդակություն ցուցաբերեց երևանաբնակ զոհված և վիրավոր զինծառայողների ընտանիքներին: Իրավիճակից և տրամադրությունից ելնելով ավանդական դարձած տոնակատարության ձևաչափը այս տարի փոքր-ինչ փոփոխության ենթարկվեց: Դա չխանգարեց , սակայն, տոնակատարությունը արժանվույնս անցկացնելուն և մեր համաքաղաքացիներին տոնական տրամադրություն պարգևելուն: Հոկտեմբերի 8-ին անցկացված և ընդամենը մեկ օր տևած տոնակատարությունն առանձնացավ իր հագեցածությամբ: Երևանի ծննդյան օրը օրենքով ամրագրված և նշվում է հոկտեմբերի երկրորդ շաբաթ, կիրակի օրը: Հոկտեմբերի 8-ին, ժամը 10:00 -22:00-ն ընկած ժամանակահատվածում ծրագրված 33 միջոցառումներն էլ ապահովեցին տոնական տրամադրությունը: Դրանք անցկացվեցին փոքր կենտրոնում՝ «Ազատության» և «Շահումյան» հրապարակներում, Հյուսիսային պողոտայում և Էրեբունի վարչական շրջանում: Ժամը 14:00-18:00-ը Էրեբունիում անցկացված տոնահանդեսի ընթացքում ներկայացվեցին ժողովրդական արվեստի գործեր, իսկ երեկոյան, ժամը 19:00-22:00-ը տեղի ունեցավ «Արևի քաղաք» համերգը: Միջոցառումների ծրագիրը կազմվել էր հաշվի առնելով մեր համաքաղաքացիների ամենատարբեր նախասիրությունները՝ ջազ, ռոք համերգներ, ռետրո մեքենաների ցուցադրություն, մանկական հարթակ երեխաների և իրենց մայրիկների համար, պարաօլիմպիկ մարզիկների երթ: Հետաքրքիր և առինքնող էր ազգային փոքրամասնությունների և էթնիկ խմբերի ողջույնի հարթակը, որտեղ երևանաբնակ ազգային փոքրամասնությունները ներկայացրեցին իրենց ազգային մշակույթը: Օրն ամփոփվեց երիտասարդական դիսկոտեկով և հրավառությամբ: Հարկ եմ համարում նշել, որ ի տարբերություն նախորդ տարիների՝ այս տարի ծրագրից դուրս թողնվեցին 3 խոշոր ռեսուրսատար միջոցառումները՝ Հանրապետության հրապարակի գալա-համերգը, Երևանի քաղաքապետարանի առջև ծրագրված բեմականացված միջոցառումն ու բազմահազարանոց շքերթը:
– Չէիք խոսի տոնական միջոցառման շրջանում իրականացված սոցիալական ակցիայի մասին:
– Արդեն ավանդական դարձած ակցիան երրորդ տարին է, ինչ անցկացվում է: Այս տարի այն անցկացվեց «Արևի քաղաք» խորագրի ներքո։ Սեպտեմբերի 27-ից մեկնարկած սոցիալական նշանակության ակցիան տևեց շուրջ 10 օր: Այս տարի այցելեցինք և նվերներ հանձնեցինք 2798 ընտանիքների։ Ծրագրի մասնակից-ընտանիքների թիվը՝ քաղաքի տարիքին համապատասխան՝ ամեն տարի փոխվում է ։ Նախագծում ընդգրկվում են տարբեր կատեգորիաների ընտանիքներ (անապահովության գնահատման համակարգում հաշվառված երևանաբնակ կարիքավոր ընտանիքներ, Արցախյան պատերազմի, այդ թվում՝ ապրիլին առաջնագծում ծավալված ռազմական գործողությունների մասնակից, վիրավորված և զոհված զինծառայողների ընտանիքներ, ինչպես նաև Հայրենական Մեծ պատերազմի վետերաններ, միաժամանակ երկու զինծառայող ունեցող ընտանիքներ, սոցիալական և հասարակական տարբեր խմբերի՝ գիտության, մշակույթի գործիչների, բուժաշխատողների, մանկավարժների, սիրիահայերի ընտանիքներ, տարեցներ, բազմազավակ և բազմանդամ, ինչպես նաև երիտասարդ ընտանիքներ): Ակցիայի շրջանակում բաժանված առաջին անհրաժեշտության կենցաղային իրերը ( փոշեկուլները, գազօջախներն ու արդուկները ) սոցիալական որոշակի խնդիրներ լուծելուց զատ նաև վկայությունն են նրա, որ մենք նրանց չենք մոռացել և քաղաքի ծննդյան օրվա կապակցությամբ նրանց հետ կիսում ենք մեր ուրախությունը:
– Իսկ ո՞վ և ինչպե՞ս է կազմում ընտանիքների ցանկը:
– Ցուցակները կազմվում են Սոցիալական ապահովության վարչության կողմից, ինչպես նաև Երևանի 12 վարչական շրջանների սոցիալական բաժինների միջոցով: Դրանից բացի Երևանի քաղաքապետարանն ունի թեժ գիծ ծառայություն, որով ստանում ենք և՛ շնորհակալական խոսքեր, և՛ դիտարկումներ, և՛ հաջորդ տարվա ցուցակում ընդգրկվելու հայտեր: Տարվա կտրվածքով մեր Սոցիալական ապահովության վարչությունը բազմաթիվ ծրագրեր է իրագործում՝ մշտապես ուշադրության կենտրոնում պահելով նշված ընտանիքների խնդիրները:
– Իսկ սոցիալական նշանակության այլ ծրագրեր այս տարվա ընթացքում իրականացվե՞լ են:
– Մեկ այլ կարևոր ծրագիր է՝ երևանաբնակ զինծառայողների ծնողների այցի կազմակերպումը սահմանամերձ գոտիներ: Դա կազմակերպվում է տարին երկու անգամ: Նախաձեռնությունը քաղաքապետ Տարոն Մարգարյանինն է: 2013 թվականից իրականացվող նախաձեռնության շրջանակում 7000 ծնող զավակներին տեսակցելու հնարավորություն է ստացել: Տրանսպորտի, սննդի ծախսերը հոգում և կազմակերպում է Երևանի քաղաքապետարանը: Այդ ծրագիրը ևս մեր քաղաքի ծննդյան օրվան նվիրված միջոցառումների ցանկում էր։
– Ինչ կմաղթեք մեր ընթերցողներին։
– Երևանի ծննդյան օրը բոլորինս է: Այն սեր խոստովանելու, միմյանց ջերմություն փոխանցելու, միասնական լինելու մեր քաղաքն արժեվորելու հրաշալի առիթ է:Մենք կարող ենք համայն աշխարհին ցույց տալ, թե ինչ ջերմ, բարի, հյուրընկալ, արևային ու լուսավոր քաղաք ունենք։
Հ.Գ. «Ճամփորդը» ևս մասնակցել է սոցիալական նշանակության այս ակցիային և հետևել ընտանիքների արձագանքին:
Զրուցեց՝ Գոյ Գեղամյանը