«ՌԵԱՆԻՄԱՆԻԱՅԻ», ԱՐԵՎԱՍԵՐ ՎԱՆ ԳՈԳԻ Ու ԱՌԱՋԻԿԱ ԾՐԱԳՐԵՐԻ ՄԱՍԻՆ
Մայրաքաղաք Երևանի կյանքում այս աշունը կառանձնանա մշակութային բազմազանությամբ ու հարուստ ծրագրերով՝ երևանցիներին ու քաղաքի հյուրերին առաջարկելով նախասիրությանն ու ճաշակին համապատասխան ժամանցի անցկացման լայն «տեսականի»: Հոկտեմբերի կարևոր իրադարձություններից մեկը՝ Երևանի անիմացիոն ֆիլմերի և պատկերապատման արվեստի «ՌեԱնիմանիա» փառատոնն էր, որի շրջանակում հոկտեմբերի 28-ից նոյեմբերի 3-ը Երևանի տարբեր դահլիճներում ներկայացվեցին հեռուստատեսային, կարճամետրաժ, լիամետրաժ ֆիլմեր և ավարտական աշխատանքներ:
Հոկտեմբերի 28-ին «Մոսկվա» կինոթատրոնում կայացավ փառատոնի պաշտոնական բացումը: Փառատոնի շրջանակում ցուցադրված առաջին ֆիլմը՝ աշխարհահռչակ գեղանկարիչ Վինսենթ վան Գոգի մասին պատմող «Վան Գոգի կրքերը» անիմացիոն ֆիլմն էր: Համաշխարհային կինեմատոգրաֆիայի պատմության մեջ առաջին լիամետրաժ անիմացիոն ֆիլմը, որը նկարվել է Վինսենթ վան Գոգի յուղաներկով արարված գեղանկարների «կենդանացման» տարբերակով՝ այդ կերպ ներկայացնելով նկարչի ուշագրավ կյանքի պատմությունը: Ֆիլմի 65000 կադրերից յուրաքանչյուրը նկարվել է ձեռքով՝ 115 պրոֆեսիոնալ գեղանկարիչների ջանքերով, ովքեր հավաքվել են Եվրոպայի տարբեր անկյուններից՝ այս յուրօրինակ ֆիլմարտադրությանը մասնակցելու համար:
Փառատոնի հիմնադիր- տնօրեն Վրեժ Քասունին իր խոսքում նշեց, որ այս տարվա փառատոնը, որը թվով 9-րդն է, ճանապարհ է հարթում դեպի 10-րդ փառատոն, որը համընկնում է հայկական անիմացիայի 80-ամյակի հետ և նշվելու է մեծ շուքով: «Թեպետ այս տարվա «ՌեԱնիմանիան» մասշտաբներով զիջում է նախորդ տարվա փառատոնին, այդուհանդերձ մրցութային ծրագրերի համար ներկայացվող հայտերի քանակը՝ արտադրության երկրների քանակի աճին զուգընթաց շարունակում է աճել: Այս տարի գրանցվել է շուրջ 2500 հայտ՝ աշխարհի մոտ 100 երկրներից»։
Հայաստանում Ֆրանսիայի դեսպանատունը «ՌեԱնիմանիա» փառատոնի հետ համագործակցում է նրա ստեղծման իսկ օրվանից։ «Մեզ համար կրկին ուրախալի է մասնակցել արդեն 9-րդ փառատոնին, որը ևս մեկ անգամ արժանին է մատուցում ֆրանսիական արտադրանքին ու ստեղծագործություններին։ Այս տարի ներկայացվելու է ֆրանսիական 2 լիամետրաժ ֆիլմ, այդ թվում՝ Մաթիո Զեթինգջիօղլուի «Burn in love» վավերագրական անիմացիոն ֆիլմը (արտամրցութային ծրագիր) և փառատոնի փակման ֆիլմը՝ «Էռնեստ և Սելեստին» անիմացիոն սիրված ֆիլմի հեղինակներ Բենժամեն Ռեների և Պատրիկ Էմբերի նոր՝«Մեծ փիս աղվեսն ու այլ պատմություններ» անիմացիոն կինոնկարը»,- նշեց Հայաստանում Ֆրանսիայի նորանշանակ դեսպան Ժոնաթան Լաքոտը։ Ընդհանուր առմամբ այս տարի ընտրվել է ֆրանսիական 32 ֆիլմ, որոնք ցուցադրվելու են 5 տարբեր անվանակարգերում՝ լիամետրաժ, կարճամետրաժ, ուսանողների ավարտական աշխատանքներ, հեռուստատեսային և ուսուցողական, ինչպես նաև երաժշտական ֆիլմեր։
Տաթևիկ Սարգսյան