«ՓՈՂՈՑԱՅԻՆ ԵՐԱԺՇՏՈՒԹՅԱՆ ՕՐ». ԼԻՏՎԱՅԻ ՆՎԵՐԸ ԵՐԵՎԱՆԻՆ

erajsht

Մայիսի 21-ի երեկոյան Հյուսիսային պողոտան երաժշտական ամենաիսկական տոնավաճառ էր հիշեցնում:  Ճեմուղու  տարբեր հատվածներում տարատեսակ երաժշտական գործիքների ձայներ էին լսվում, որոնք, միախառնվելով իրար, յուրօրինակ մթնոլորտ էին ստեղծում՝ ներկաներին տեղափոխելով  պողոտայով մեկ ձգվող խիստ  «առաձգական» բեմահարթակ: Հյուսիսային պողոտան  պարուրել էր կենդանի երաժշտությունը: Ունկնդիրների պակաս նույնպես չէր զգացվում:

Երևանի քաղաքապետարանի օժանդակությամբ  Լիտվայի դեսպանատան կողմից   կազմակերպված  «Փողոցային երաժշտության օր»-ն էր անսպասելի աժիոտաժի ու  «էքսպրոմտ» տոնականության  պատճառը:  Ձեռնարկից անտեղյակ մարդիկ լսելով երաժշտության այնը,  մոտենում էին ձայնի ուղղությամբ և ակամայից վերածվում հանդիսատեսի: Իրավ որ, փողոցում  հնչող երաժշտությունն ավելի կենդանի ու  գրավիչ է: Մի տեսակ ավելի անմիջական ու առինքնող:  Հյուսիսային պողոտան շաբաթ երեկոյան մարդաշատ էր: Մի վայրում հնչում էր վոկալ կատարում, մեկ այլ տեղ ելույթ էին ունենում լարային գործիքները, երրորդ հատվածում դասական  ստեղծագործություններ էր կատարում կվարտետը, չորրորդում հնչում էր Կոմիտաս` երաժշտական քանոնների կատարմամբ: Ի թիվս շատերի,Հյուսիսային պողոտայում ելույթ էին ունենում նաև Ալեքսանդր Սպենդիարյանի անվան երաժշտական դպրոցի սաները՝ տարբեր երաժշտական գործիքներով և տարբեր կատարումներով: «Լիտվայի դեսպանատան կողմից  կազմակերպված փառատոնին, որն ի դեպ, իրենց մոտ «Փողոցային երաժշտության փառատոն» է կոչվում, որոշեցինք մենք էլ մասնակցել: 16 երկրներում անցկացվող փառատոնին, Հայաստանն առաջին անգամ է մասնակցում», մեզ հետ զրույցում  պարզաբանում է դպրոցի տնօրեն  Ալինա Վարդանյանը:

Լիտվայի դեսպանատունը դիմել է Երևանի քաղաքապետարանին, իսկ քաղաքապետարանն էլ ընդառաջելով դեսպանատան նախաձեռնությանը կազմակերպել է մնացած միջոցառումները: Փառատոնի թե երգացանկը, թե մարդացանկը  ընդգրկուն է: Բացօթյա տարածքում  հնչում են թե դասական, թե ժողովրդական կատարումներ: Ի դեպ, Ալեքսանդր  Սպենդիարյանի անվան երաժշտական դպրոցում են ուսանում նաև Լիտվայի հյուպատոս Դովիլա Սուրվելեյդայի երեխաները: Նրանք նույնպես ելույթ ունեցան  Հյուսիսային պողոտայում  և ֆլեյտայով և ջութակով իրենց կատարմամբ հաճույք պատճառեցին ներկաներին: Մեզ հետ զրույցում Լիտվայի հյուպատոս Դովիլա Սուրվելեյդան անդրադարձավ միջոցառման խորհրդին ու նշանակությանը: «Մենք՝ Լիտվայի բնակիչներս, շատ ենք սիրում նվագել ու երգել: Ձևավորված ավանդույթի համաձայն, ամեն տարի մայիս ամսին մենք Լիտվայում դուրս ենք գալիս փողոց՝ երգելու և նվագելու: Ու այդ ավանդույթին հետևում են ոչ միայն մայրաքաղաք Վիլնյուսում, այլև  մնացած բոլոր քաղաքներում:  Ու քանի որ այս տարի լրանում է Հայաստանի և Լիտվայի միջև դիվանագիտական հարաբերությունների  հաստատման 25-ամյակը,  Լիտվայի դեսպանատունն, ի դեմս մեր դեսպանի, որոշեց այսպես նշել այդ կարևոր տարեդարձը:  Հայաստանում առաջին անգամ անցկացվող «Փողոցային երաժշտության օրվա»  կյանքի կոչման հարցում մեզ աջակցեց Երևանի քաղաքապետը»:

 

Գագիկ Մարգարյան

Login

Welcome! Login in to your account

Remember me Lost your password?

Don't have account. Register

Lost Password

Register