Ցանկանո՞ւմ եք միանալ և Ձեր ներդրումն ունենալ Կովկասյան տարածաշրջանում անցկացվող ամենաոգեշնչող փառատոներից մեկին, նոր ընկերներ ձեռք բերել և անմոռանալի ամառային արձակուրդ անցկացնել տարբեր ազգերի ներկայացուցիչների հետ: Եթե այո, ապա «One Caucasus» փառատոնը հենց Ձեզ համար է: «One Caucasus»-ը բազմամշակույթ փառատոն լինելուց բացի՝ սահմանամերձ շրջանների համար նախատեսված երկարաժամկետ ծրագիր է, որն անցկացվում է Վրաստանի Մառնեուլի շրջանի Ծերակվի փոքրիկ գյուղում: Առաջին անգամ այն անցկացվել է 2014 թվականին: Չորրորդ տարին անընդմեջ անցկացվող փառատոնն այս  օգոստոսին կմիավորի Հայաստանի, Ադրբեջանի, Վրաստանի, Ալբանիայի, Արգենտինայի, Բանգլադեշի, Բելառուսի, Չեխիայի, Էստոնիայի, Գերմանիայի, Հնդկաստանի, Իրանի, Քենիայի, Նեպալի, Նիգերիայի, Պակիստանի, Լեհաստանի, Ռուսաստանի, Թունիսի, Ուկրաինայի, ԱՄՆ-ի ներկայացուցիչներին:

One Caucasus» փառատոնն այս տարի անցկացվելու է օգոստոսի 24-27-ն ընկած ժամանակահատվածում: Փառատոնը համախմբում է ակտիվիստների, անիմատորների, ճարտարապետների, նկարիչների, խոհարարների,դիզայներների, կրթական ոլորտի մարդկանց, կինոարտադրողների, լրագրողների, երաժիշտների, լուսանկարիչների և այլ մասնագիտությունների տեր մարդկանց՝ Միջազգային կամավորության ծրագրի (IVP) շրջանակներում:

Ավելի քան 15 երկրից ժամանելիք  կամավորները  3 շաբաթ միասին աշխատելու են Ծերակվիում:  Տարաբնույթ ծրագրերի վրա  աշխատելով՝ նրանք գլխավորապես կենտրոնանալու են հատկապես Մառնեուլի շրջանում (այս շրջանը Վրաստանի ամենաբազմամշակութային շրջանն է) կազմակերպվելիք  կրթական նախագծերի վրա: «One Caucasus IVP 2017»-ը Հայաստանից հյուրընկալելու է 10 կամավորի: «One Caucasus»-ը կամավորների 3 շաբաթվա աշխատանքների ամփոփիչ փուլն է:

Ավելին, փառատոնի ընթացքում կարելի է մասնակցել ամենաբազմազան ու ոգեշնչող երաժշտական համերգների, որոնց ընթացքում Հայաստանից, Ադրբեջանից և Վրաստանից ժամանած երաժիշտները հանդես կգան  այլ երկրներից ժամանած երաժիշտների հետ համատեղ: «One Caucasus»-ին մասնակցությունն անվճար է: Փառատոնի բոլոր նախաձեռնությունները սատարող Մառնեուլիի տեղական իշխանություններն ապահովում են ամենօրյա անվճար տեղափոխում Թբիլիսիից, Հայաստանի և Ադրբեջանի սահմանամերձ շրջաններից մինչև փառատոնի անցկացման վայրը: Հարևանությամբ գործող վրանային գիշերակացի համար նախատեսված գոտին նույնպես տրամադրվում  է անվճար: Փառատտոնի մանրամասների մասին «Ճամփորդը» զրուցել է ծրագրի համակարգող, «One Caucasus» ՀԿ-ի անդամ Իրակլի Միկիանիի հետ:

– Ո՞րն է փառատոնի գլխավոր նպատակը, ո՞վ է ֆինանսավորում այն:

– «One Caucasus»-ը նպատակ ունի ստեղծել ապահով և ոգեշնչող վայր Կովկասում՝ երիտասարդների հանդիպումների համար: Այն ֆինանսավորվում է Մառնեուլիի քաղաքապետարանի և Լեհաստանի արտաքին գործերի նախարարության կողմից:

– Ի՞նչ միջոցառումներ են նախատեսվում փառատոնի շրջանակներում:

– Փառատոնը մեկտեղելու է  գեղանկարչական, կրթական, երաժշտական, սպորտային և այլ ոլորտների  միջոցառումները:

– Ի՞նչ կասեք երաժշտության մասին: Ովքե՞ր են ներկայացնելու Հայաստանը, Ադրբեջանը փառատոնի ընթացքում:

-Հայաստանը ներկայացնելու են Գարիկ Պապոյանը և Սոնան, «Վիշապ» անսամբլը, «Ջրիմուռներ» խումբը, Մարինե Հակոբյանը (Մարբեյ), «Լյուսի Խանյան» տրիոն: Ադրբեջանից սպասում ենք «Natig Rhythm» խմբի և «Ահմեդովսկի» տրիոյի մասնակցությանը: Փառատոնին մասնակցելու են նաև երաժիշտներ Վրաստանից, Լեհաստանից, Սենեգալից, Մարտինիկայից և այլ երկրներից:

 – Ինչպե՞ս կարող են ցանկացողները մասնակցել փառատոնին:

– Եթե Հայաստանից ինչ-որ մեկը ցանկանում է միանալ փառատոնին, հարկավոր է գալ Սադախլո, որտեղից նրանց երթուղայիններով կտեղափոխեն Ծերակվի: Նրանք կարող են վայելել իրենց անվճար գիշերակացը վրաններում՝ հատուկ նախատեսված գոտում: Ցանկացողները կարող են կապվել «One Caucasus» նախաձեռնության կազմակերպիչների հետ  «Ֆեյսբուքում» կամ գրել նրանց էլեկտրոնային հասցեին : Կարող եք նաև պարզապես ուղղել Ձեր հարցերը ծրագրի համակարգող Իրակլիին հետևյալ էլեկրոնային հասցեով

Տաթևիկ Սարգսյան

Լուսանկարները՝ Օնիկ Ջեյմս Մորիսոն Կրիկորեանի