ՆՎԱԶԱԳՈւՅՆ ԱՇԽԱՏԱՎԱՐՁԻ ԴԻԼԵՄԱՆ
Ավելի շատ գործազրկությո՞ւն, թե՞ ավելի քիչ աղքատություն
Կառավարության կողմից պաշտոնապես հրապարակված ծրագրի համաձայն՝ առաջիկա հնգամյակում նախատեսվում է նվազագույն աշխատավարձը բարձրացնել 25% -ով: Ձեռնարկի հիմնական նպատակը աղքատության մակարդակի 12% -ով կրճատումն է:
Առաջին հայացքից` նվազագույն աշխատավարձի բարձրացումն ապահովում է ավելի բարձր դրամական մուտքեր, հատկապես ցածր և միջին եկամուտ ունեցող տնային տնտեսությունների համար: Այնուամենայնիվ, ամեն ինչ այնքան էլ պարզ չէ, որքան թվում է: Դիտարկենք այս քայլի հնարավոր մի քանի հետևանքները: Տարիներ շարունակ տնտեսագետներն ուսումնասիրել են նվազագույն աշխատավարձի բարձրացման ազդեցությունը աշխատողների, բիզնեսի և տնտեսության վրա: Ուսումնասիրության արդյունքներն ու այդ կապակցությամբ վկայաբերվող փաստարկները տարբեր են:
Դիտարկումների համաձայն՝ աշխատավարձի նվազագույն շեմի բարձրացումն ավելացնում է բիզնեսի ծախսերը: Որպես հետևանք՝ բիզնեսները սեղմում են աշխատակազմը՝ այդ կերպ նպաստելով գործազրկության մակարդակի բարձրացմանը:
Երկրորդ՝ նվազագույնից բարձր աշխատավարձերը կրճատելով՝ գործարարները պակասեցնում են աշխատակիցների ամսական եկամուտը, կամ էլ բարձրացնում՝ իրենց արտադրանքի և մատուցած ծառայությունների գները՝ ավելացնելով սպառողների ծախսերը: Հակառակը նույնպես հնարավոր է: Միևնույն ժամանակ և՛ ավելի շատ եկամուտ, և՛ զբաղվածության մակարդակի բարձրացում:
Ցածր կամ միջին դրամական մուտքեր ունեցող տնային տնտեսությունների եկամուտների բարձրացումը նպաստում է նրանց գնողունակության աճին և կարող է աշխուժություն մտցնել գործարար ոլորտում՝ մեծացնելով ապրանքների և ծառայությունների հանդեպ պահանջարկը:
Միացյալ Նահանգների նախկին նախագահ Բարաք Օբաման, Մեծ Բրիտանիայի էքս վարչապետ Դեվիդ Քեմերոնը և Գերմանիայի կանցլեր Անգելա Մերկելը հայտարարել են, որ նվազագույն աշխատավարձի բարձրացումն օգնում է ցածր եկամուտ, ինչպես նաև ցածր որակավորում ունեցող աշխատողներին, խթանում տնտեսական աճը: Տեսակետի հակառակորդները պնդում են, որ նվազագույն աշխատավարձի բարձրացումը նպաստում է գործազրկության մակարդակի բարձրացմանն ու արտադրանքի և ծառայությունների գնաճին:
Իսկ որքա՞ն արդյունավետ կարող է լինել նվազագույն աշխատավարձի բարձրացումը Հայաստանի նման երկրների պարագայում: Հաշվի առնելով 2016թ.-ի տնտեսական ակտիվության (0.2%) գրեթե զրոյական աճը, և արագ տեմպերով աճող միգրացիան, այս քայլը կարող է աղքատության դեմ պայքարի գործիք հանդիսանալ:
Ներկայումս Հայաստանում նվազագույն աշխատավարձը (առանց հարկերի) կազմում է ամսական 55 հազար դրամ (մոտ 115 ԱՄՆ դոլար), ինչը ամենացածրն է տարածաշրջանում՝ Ադրբեջանից հետո: Դրան գումարած բարձր է նաև աղքատության մակարդակը աշխատանքով ապահովվածների շրջանում: Այսպիսով, նվազագույն աշխատավարձի բարձրացումը կարող է դառնալ աղքատության դեմ պայքարի արդյունավետ միջոց: Խնդրի շուրջ քննարկումները շարունակվում են:
Այնուամենայնիվ, մեզ՝ Հայաստանի քաղաքացիներիս պետք է պարզ լինի, որ նվազագույն աշխատավարձի բարձրացումը չի կարող ոչ տնտեսությունն ավիրել, ոչ էլ լինել երկնառաք «կախարդական հաբ»: Յուրաքանչյուր քաղաքականություն վաղ թե ուշ «ապացուցում» է իր կենսունակությունն ու ապրելու իրավունքը:Մեզ՝ սպասելուց բացի այլ բան չի մնում…
Գայանե Սարգսյան