Դեկտեմբերի 23-ին մեկնարկեց  «Նվիրիր տոն»  նախագիծը, որի շրջանակներում մոտ 100 երեխա Տավուշի մարզի սահմանամերձ գյուղերից` Չինարիից, Ներքին Կարմիրաղբյուրից, Բաղանիսից և Բեքաբերից մասնակցեցին նախատոնական երկօրյա միջոցառմանը Թուֆենկյանի «Ավան Ձորագետ» հյուրանոցում:  Միջոցառումը վարում  էր Ավետ Բարսեղյանը: Ծրագրի ընթացքում երեխաները ծանոթացան ավանդական հոլ խաղի կանոններին, մարզվեցին «Սթրիթ Վոռքաութ» – ի թիմի տղաների հետ,  ծանոթացան փողոցային մարզումների գաղտնիքներին, այցելեցին «360 աստիճան» կինոթատրոն և դիտեցին աշխարհի արարման մասին պատմող ֆիլմը: Այնուհետև սեփական ձեռքերով պարաստեցին ամանորյա խաղալիքներ և լուսանկարվեցին սիրված դերասաններ  Միհրան Ծառուկյանի,  Վաչե Թովմասյանի, Արփինե Գաբրիելյանիել և  Անատի Սականյանի հետ:

Ծրագրի երկրորդ  հատվածում երեխաներին  ուրախ ժամանց պարգևեց  Հ. Մալյանի անվան կինոդերասանի թատրոնը` հայկական հեքիաթների մանրապատումներ ներկայացնելով: Այնուհետև երեխաները բազմաթիվ նվերներ ստացան Ձմեռ պապիկից: Երեկոն ամփոփվեց գունազարդ ու պայծառ հրավառությանբ:

Նախագիծը կազմակերպվել էր Առաջին տիկնոջ բարձր հովանու ներքո՝ «Երևան Փրոդաքշն» (Yerevan Productions) ընկերության ջանքերով:

«Ամեն տարեվերջ «Երևան Փրոդաքշն» ընկերությունը տարին  ամփոփում է որևէ բարեգործական նախաձեռնությամբ: Մեր ուշադրության կենտրոնում միշտ եղել են  ոչ միայն  մանկատները, այլև սոցիալապես անապահով ընտանիքներն ու սահմանամերձ գյուղերում բնակվող մանուկները. նրանց բոլորի համար մենք միշտ փորձում ենք մի հիշարժան նախագիծ իրականացնել:

Այս տարի որոշեցինք  իրականացնել «Նվիրիր Տոն» փառատոնը,  որի շրջանակներում փորձեցինք Ամանորի շեմին իսկական տոն նվիրել Տավուշի մարզի սահմանամերձ գյուղերում բնակավող երեխաներին` նվիրելով նրանց երկօրյա  ուրախ  ծրագիր  Թուֆենկյանի «Ավան Ձորագետ» հյուրանոցում:

Հուսով ենք, որ «Նվիրիր տոն» փառատոնն այսուհետ կդառնա շարունակական և մենք կկարողանանք ամեն տարի ավելի շատ երեխաների  անմոռաց տոն պարգևել», – մեզ հետ զրույցում ասաց  «Երևան Փրոդաքշն» (Yerevan Productions) ընկերության տնօրեն` Ալիսա Մուրադյանը: