ՄԵՏԱՔՍԻ ՃԱՆԱՊԱՐՀԻ ՀԱՅԿԱԿԱՆ ՀԵՏՔԵՐԸ
«Մետաքսի ճանապարհ». հնում այսպես էր կոչվում Չինաստանն Առաջավոր Ասիային, ապա նաև Եվրոպային կապող առևտրային մայրուղին: Ք.ա. 2-րդ դարից գործած և մինչև Ք.հ. 16-րդ դար գոյատևած առևտրա-քարավանային մայրուղին «Մետաքսի ճանապարհ» էր կոչվում սկզբնապես փոխադրվող հիմնական ապրանքի՝ չինական մետաքսի պատվին: «Մետաքսի ճանապարհ»-ի երկարությունը՝ ավելի քան 7 հազար կմ էր: Ծովագնացության զարգացմանը զուգահեռ Մետաքսի ճանապարհի ցամաքային ուղուն ավելացավ նաև ծովայինը: Արևելքն ու Արևմուտքը միմյանց կապող այս առևտրային ուղին տնտեսականից բացի նպաստում էր նաև երկրների մշակութային և քաղաքական շփումներին: Հենց այս ուղու շնորհիվ միմյանց հետ սկսեցին առևտուր անել ու միմյանց հետ հարաբերվել հին ու նոր աշխարհները: Չինաստանը, Հնդկաստանը, Մերձավոր Արևելքի երկրները հասան Եվրոպա, ու ճիշտ հակառակը՝ եվրոպացիներն էլ դրա միջոցով հասան մինչև «աշխարհի ծայրը»: Միմյանց հետ իրականացվող առևտրից բացի, այս երկրներն առևտուր էին անում նաև միջնորդ երկրներում, որոնցից էր նաև Հայաստանը: Արտաշատում հայտնաբերված տարբեր երկրների մետաղադրամները վկայությունն են նրա, որ այդ երկրների առևտրականները հաճախ են եղել Արտաշատում:
Կիլիկյան Հայաստանն իբրև Մետաքսի ճանապարհի ծովային դարպաս
Մետաքսի ճանապարհի փառահեղ պատմությունն ավելի շուտ կավարտվեր, եթե չլիներ Կիլիկյան Հայաստանը: Ծովային նավագնացության զարգացմանը զուգահեռ Մետաքսի ճանապարհի դերը գնալով թուլանումէր: Իր սև գործն էր անում նաև ծովահենությունը: Կիլիկյան Հայաստանը,սակայն, փոխեց իրավիճակը: Կիլիկիան առևտրային ու ռազմական իր նավատորմն ունեցող հայկական թագավորություն էր: Ասել է թե՝ ծովային պետություն էր, որը դարձավ Արևելքից դեպի Եվրոպայի նավահանգիստները ձգվող Մետաքսի ճանապարհի ծովային դարպասը:
Մոզի հնավայրը
Մոզը քաղաք է եղել դեռևս բրոնզի դարում: Այն նշանավոր առևտրա-արհեստավորական կենտրոն էր նաև միջնադարում: Ժամանակի ընթացքում փարթամ բուսականության և անտառների կորուստը հանգեցրել է տեղանքի անապատացմանը: Այսօր այս վայրից գրեթե ոչինչ չի պահպանվել: Ավերիչ երկրաշարժը ոչնչացրել է քաղաքը, որ Հայաստանով անցնող Մետաքսի ճանապարհի կարևոր կանգառներից է եղել: Այստեղ կան պեղված դամբարաններ և դամբարանադաշտ: Դրանցում հայտնաբերվել են զույգերով կատարված թաղումներ, մարդկային ածխացած կմախքներ, կավե, խեցե անոթներ, վանակատե և բրոնզե առարկաներ: Անոթների ձևն ու գույնը վերագրվում են մ.թ.ա. 2-րդ հազարամյակի սկզբին: Մոզը կործանվել է 735թ. երկրաշարժից և ամբողջապես ծածկվել լավայով: Այստեղից պեղված գտածոները պահպանվում են Եղեգնաձորի երկրագիտական թանգարանում: Մետաքսի ճանապարհի պատմությունը լավագույնս ուսումնասիրել ու իր ֆիլմում ներկայացրել է երիտասարդ կինոռեժիսոր Ռուբեն Գինեյը: