ՄԵՐ ՔԱՂԱՔԻ «ԴԱԼԱՆԸ»
Աբովյան փողոցով քայլելիս հանկարծ, նկատում ես իրականությունից կտրված փոքրիկ մի անկյուն. «Դալանն» է: Դուռը բացելով՝ մտնում ես ազգային կոլորիտով հագեցած սրահ, որտեղ ձեռագործ աշխատանքների լայն ընտրանին է՝ ցանկացած ճաշակի տեր մարդկանց համար. զարդեր,գրքեր, հայկական տիկնիկներ, արձանիկներ, հուշանվերներ: Բացում ես երկրորդ դուռը և հայտնվում՝ հայկական տարազային ժիլետների, պայուսակների, տարատեսակ գլխարկների, կավե արձանիկների, ամանների, ժամանակակից հայ նկարիչների աշխատանքների հարուստ տեսականի ունեցող դալանյան բակում: Մի փոքր աջ՝ գտնվում է բացօթյա սրճարանը, որտեղ անպակաս են ազգային և էթնիկ համերգները:
Սրճարանի դիմաց «Դալան» ցուցասրահն է՝ նախատեսված ժամանակակից արվեստի ցուցադրման համար: Բարձրանում ես աստիճաններով և հայտնվում հին ու ներդաշնակ անկյունում, որտեղից չես էլ ուզում դուրս գալ: «Դալանը» ներկայացնում է տեղականը, ցուցասրահում ցուցադրում հայ նկարիչների, ժողովրդական արտիստների աշխատանքները: Ազատ հարթակ ստեղծագործ մարդու համար: «Դալանի» տարածքը, որն առաջ ֆոտո դալան էր, մի խումբ ստեղծագործողների կողմից վերանորոգվել և ստացել է այժմյան տեսքը 2010 թվականին՝ պահպանելով հին ձևը: Հուշանվերների խանութը, սրճարանը և ցուցասրահը տարբեր հիմնարկներ են, որոնք գործի բերումով համագործակցում են. հաճելի զուգադիպություն: Այցելուները և՛ տեղաբնակներն են, և՛ արտասահմանցի զբոսաշրջիկները: Ինչ խոսք, հրաշալի և տաք վայր բոլորի համար: Դե, երբ զբոսնելու լինեք Աբովյան փողոցով, ուշադրություն դարձրեք և գոնե մեկ անգամ այցելեք «Դալան»:
Գոյ