ԼՈՌՈւ ՄԱՐԶՈւՄ ՍՄԱՐԹ ԿԵՆՏՐՈՆԸ ԲԱՑԵՑ ԻՐ ԴՌՆԵՐԸ
Լոռու մարզի Դեբետ համայնքում արդեն գործում է Հայաստանի մանուկներ հիմնադրամի (ՔՈԱՖ) ՍՄԱՐԹ կենտրոնը: Այն եզակի է իր տեսակի մեջ՝ առաջարկվող ոչ ֆորմալ կրթության հնարավորություններով ու գյուղական համայնքների զարգացմանն ուղղված ծրագրերով:
«Եթե ուզում ես ոգեշնչել մարդկանց, հատկապես երիտասարդներին, պետք է կառուցել մի այնպիսի բան, որ բացառիկ ազդեցություն կունենա։ Իմ ընկերոջ խոսքերն են։ Ու մենք Հայաստանի գյուղական այս չքնաղ բնության գրկում ստեղծեցինք ՔՈԱՖ ՍՄԱՐԹ կենտրոնը»,- ՍՄԱՐԹ կենտրոնի ստեղծման նախապատմությունն է ներկայացնում Հայաստանի մանուկներ հիմնադրամի հիմնադիր և գործադիր տնօրեն Գարո Արմենը:
Մայիսի 27-ին ՍՄԱՐԹ կենտրոնի բացումն էր: Կենտրոնի տնօրեն Քրիստ Մարուքյանը լրագրողների համար շրջայց է կազմակերպում, ներկայացնում ՍՄԱՐԹ-ի հնարավորությունները, արդեն իսկ գործող խմբակներն ու առաջիկա անելիքները:
ՍՄԱՐԹ կենտրոնում եռուզեռ է: Լոռու մարզի տարբեր համայնքներից եկած երեխաները հարյուրավոր հյուրերին են ներկայացնում այն ամենն, ինչին սովորել են ՔՈԱՖ-ի իրականացրած ծրագրերի արդյունքում: Երգի, պարի, մեդիագրագիտության, անգլերենի, ռոբոտաշինության, ձայնագրման խմբակներ այցելող երեխաները հնարավորություն են ունենում ոչ ֆորմալ կրթության միջոցով ծանոթանալ ազգային պարերի շարժումներին, վարժ խոսել և հաղորդակցվել անգլերեն, զարգացնել ձայնագրման և երաժշտական հմտությունները: ՍՄԱՐԹ-ը հավասար հնարավորություններ է ապահովում Լոռու մարզի գյուղերի 3 տարեկանից բարձր 150000 երիտասարդների և մեծահասակների համար:
«Ի դեմս ՍՄԱՐԹ կենտրոնի՝ մենք ունենալու ենք ստեղծարար միջավայրի մի նոր օրինակ։ Եվ այդպիսի օրինակները մեր անձնական ջանքերով տեսանելի ապագայում տարածվելու են Հայաաստանի Հանրապետությունով մեկ։ Իմ շատ սիրելի պատանիներ, եղեք երազող և հավակնոտ, որովհետև ձեր երազանքներն ու հավակնություններն են այն նպատակները, որոնք պիտի դրվեն մեր կառավարության սեղանին և, առհասարակ, ապագա բոլոր կառավարությունների սեղաններին»,- նշում է ՀՀ փոխվարչապետ Տիգրան Ավինյանը։
Ռոբոտիկայի ու ծրագրավորման ոլորտում ՍՄԱՐԹ-ի տարածաշրջանային բացառիկ գործընկերն է ձեռնարկությունների ռեսուրսների կառավարման ավտոմատացված SAP ընկերության Next-Gen լաբորատորիան։ ՔՈԱՖԸ համագործակցում է PicsArt-ի հետ, որի մշակած հավելվածը ամսական 100 միլիոն օգտատեր ունի։ Այն հնարավորություն է տալիս մոնտաժելու լուսանկարները ու դրանց հետաքրքիր ու անսպասելի լուծումներով կիսվելու ընկերների հետ։ Նոր գործընկերություն է հաստատվել նաև ռոբոտիկայի և վերապատրաստումների «Ինստիգեյթ» ընկերության հետ՝ նպատակ ունենալով բազմազան տեխնոլոգիաներ ու հմտություններ բերել ՔՈԱՖ ՍՄԱՐԹ կենտրոն։ Ստեղծարար կրթական տեխնոլոգիաների (CET) Հայաստանում պաշտոնական ներկայացուցիչը՝ «ԼԵԳՈ»-ն, աշխատարաններ է վարելու կենտրոնի սաների համար։ Արևային էներգիայի և մարտկոցների «Ֆրի Էներջի» ընկերությունը ևս ներգրավված է ՍՄԱՐԹ կենտրոնի աշխատանքներում։
ՔՈԱՖ ՍՄԱՐԹ շենքի ճարտարապետն է Փոլ Գալուստյանը՝ լիբանանահայ մասնագետ, որի առաջին մեծ նախագիծն է Հայաստանում: Ճարտարապետական գործընկերն է «Ուրբան Յունիթ» նախագծային կազմակերպությունը։ Շինարարությունն իրականացրել է «Կանակա» շինարարական ձեռնարկությունը։ Շենքի շինարարության, տեխնիակական վերազինման ու կահավորման վրա արդեն իսկ ծախսվել է 5 միլիոն դոլար։
ՍՄԱՐԹ ավանն ունի նաև հյուրատուն՝ հրավիրված մանագետներին ու զբոսաշրջիկներին հյուրընկալելու համար։
Տաթեւիկ Սարգսյան
Լուսանկարները՝ Հայաստանի մանուկներ հիմնադրամի