ԼԱՎ ԲԱՆԵՐ ԳՐՈՂ ԱՂՋԻԿԸ
Ծանոթացեք Լավ Բաներ գրող աղջկա հետ: Գանգուր մազերով այս աղջիկը շրջում է Մաշտոցի պուրակի տարածքում՝ դեղին փոքր թղթիկները ու ֆլոմաստերը ձեռքին: Երբ Արցախ գնացող հերթական տուփը լցվում է, փակելուց առաջ կանչում են Լավ Բաներ գրող աղջկան: Աղջիկը թղթիկներից մեկի վրա Լավ Բան է գրում, ու դնում է տուփի մեջ:«Դուխով», «Ուժդ անսպառ», «Անուշ լինի մեր հերոսներ», «Հպարտ եմ ձեզնով իմ հերոս ախպերներ», «Մենք հպարտ ենք ձեզնով, ցավներդ տանենք», «Ղուրբան լինենք ձեր ոտքերին, մեր զինվորներ»…
Քանի օր է Մաշտոցի պուրակը մարդաշատ էր, ասեղ գցելու տեղ չկա: Օրեր առաջ այստեղ սկսվեց «Առաջին անհրաժեշտության իրեր և սնունդ թիկունքից առաջնագիծ» նախաձեռնությունը: Ողջ քաղաքը շտապում էր սնունդ ու հագուստ տեղ հասցնել և մասնակցել:
