ԱՄԱՌԱՅԻՆ ՄԱՆԿՈւԹՅՈւՆ՝ ԱՌԱՆՑ ԳԱՋԵԹՆԵՐԻ
Ամռանը ջերմաստիճանի հետ բարձրանում-ավելանում է նաև ազատ ժամանակը: Կարևոր է արդյունավետ պլանավորել ժամանցը ոչ միայն ծովափին, այլև տանը՝ երեխայի հետ անցկացվող ամեն օրը դարձնելով հետաքրքիր: Առաջարկում ենք մի քանի պարզ խորհուրդ, որոնք կօգնեն ձեր երեխաներին կտրել համակարգիչներից ու հեռուստացույցներից և ունենալ անմոռանալի արձակուրդներ:
Հատկապես մայրաքաղաքի բնակիչների համար ամառը գյուղի բարեկամներին, տատիկ-պապիկներին այցելելու լավագույն ժամանակն է: Կարելի է տանը փակվելու փոխարեն մոտակա այգում զբաղվել ծաղիկների մշակմամբ կամ գնալ միրգ հավաքելու: Համոզված ենք՝ ձեր երեխաները մեծ ուրախությամբ սեփական թաթիկներով ծիրան, գիլաս ու խնձոր կքաղեն ծառերից, հետո էլ հյուրերեի մոտ գլուխ կգովան, որ իրենք են հավաքել:
Պատրաստեք միասին: Եթե որևէ երեխայի ուղարկեք խոհանոց ինչ-որ բան պատրաստելու, նա բնականաբար կընդվզի: Բայց եթե միասին որևէ հետաքրքիր բան մտածեք պատրաստել, ասենք՝ մրգային կոկտեյլ կամ տորթ, ոչ մի երեխա ձեզ չի կարողանա մերժել:
Թույլ տվեք երեխան խաղա հողի հետ: Ասֆալտին ու բարձրահարկ շենքերին սովոր երեխաները գործնականում հաջողելու շատ ավելի քիչ շանսեր ունեն, քան նրանք, որոնք կյանքի տարբեր իրավիճակներում փորձում են ամեն ինչ: Թույլ տվեք երեխան հողից տարբեր առարկաներ պատրաստի, մոտիկից շփվի բնության ամեն մի տարրի հետ, ճանաչի ու սիրի այն միջավայրը, որտեղ ապրում է:
Ուղարկեք երեխային ճամբարներ, որքան հնարավոր է՝ քաղաքակրթությունից «զուրկ» ճամբարներ: Սա կօգնի երեխային դուրս գալ կոմֆորտի գոտուց և նոր հմտություններ զարգացնել, սովորել շփվել հասակակիցների հետ, որոշում կայացնել ու պատասխանատվություն կրել այդ որոշումների համար:
Ամռանը լավագույնն շրջանն է նոր բան սովորելու համար: Կարելի է վերջապես ժամանակ գտնել ու երեխային տանել, ասենք, թենիսի, լողի, ժայռամագլցման, սլեքլայնի: Ու համոզված եղեք՝ ձեր երեխան ոչ ոտք կկոտրի, ոչ ձեռք, փոխարենը կսովորի անընդհատ նոր խոչընդոտներ հաղթահարել ու առաջ գնալ:
Ավելի արկածասերները կարող են գետերի ափերին փոքրիկ ջրամբարներ սարքել ու գետաբերանի ավազով ամրոցներ կառուցել։
Կարելի է տերևների տեսականի հավաքել։ Երեխաները սիրում են հետևել տարբեր կենդանիների և միջատների։ Եթե հետաքրքիր պատմություններով ներկայացնեք այդ ամենը, ամբողջ օրը կարող են անտառում, այգում կամ որևէ տեղ փնտրել ու անվնաս հետևել միջատներին, ձեռքով նկարել նրանց։
Գիշերները խարույկի մոտ պառկել-պատմել աստղերի տակ՝ խոսելով մոլորակների, աստղերի ու տիեզերքի մասին։
Նոր բառեր սովորել ու բառախաղեր խաղալ, սպորտային մանկական մրցույթներ կազմակերպել։
Եղեգնե կամ փայտե տնակ պատրաստել, կենցաղային իրեր պատրաստել կավից։
Բարձրանալ տանիքներ՝ մեքենայի, ավտոտնակների, տների, բարձրահարկերի, հին շինությունների, վերամբարձ կռունկների և բոլոր հնարավոր տեղերի։
Նկարել-նկարել-նկարել՝ ավազին, քարին, թղթին, օդում:
Հետևել ամպերին ու երկնքում գտնել թռչող շանը, վազող փղին կամ ջրում պառկած գետաձիին:
Տաթեւիկ Սարգսյան