ՀԱՅԱՍՏԱՆԻ ԱՄԵՆԱՄԵԾ ՓՈՒՉԻԿԸ
Հայաստանի առնական լեռներն ու խորախորհուրդ ձորերը բարեհաճ են գտնվել Հայաստանի ամենամեծ փուչիկի՝ «Skyball» օդապարիկի հանդեպ: Նրա հանդեպ սիրալիր են տրամադրված նաև օդային վերին շերտերը: Եռագույն ներկված օդապարիկն առաջին անգամ օդ է բարձրացել երկու տարի առաջ, Հայաստանի անկախության 23-ամյակի օրը՝ Երևանի «Հաղթանակ» զբոսայգում։ Հայաստանի միակ օդապարիկի միջոցով հարյուրավոր մարդիկ մոտիկից են տեսել «փափլիկ» ամպերը, հազարավոր մետր բարձրությունից հիացել մեր անհարթ ու ծալքերով հարուստ բնապատկերներով, ջրերով և հեռվից երևացող «փոքրիկ» տներով։ Զբոսաշրջիկներին օդապարիկը հնարավորություն է տվել Հայաստանը բացահայտել միանգամայն նոր դիտանկյունից։ Այս ամենից զատ, «Skyball» օդապարիկն է ներկայացնում Հայաստանի օդագնացների սպորտի ֆեդերացիան, հայոց եռագույնով թռիչքներ իրականացնում օտար երկինքներում՝ միջազգային մրցումներում և փառատոներում։ «Ճամփորդը» զրուցել է «Skyball»-ի օդաչու, Հայաստանի օդագնացության սպորտի ֆեդերացիայի նախագահ Նաիրի Բարսեղյանի հետ։
– Որքան ժամանակ է Հայաստանում գործում «Skyball» օդապարիկը:
– Ավելի քան 10 տարի՝ Հայաստանում օդապարիկ ունենալու և այստեղ թռիչքներ իրականացնելու փորձեր ենք արել: Մշտապես ինչ-որ խոչընդոտներ էին առաջանում: Օրենքները կամ թերի էին կամ ընդհանրապես բացակայում էին, քանի որ նոր ոլորտ էր: Վերջապես 2014 թվականին հաջողվեց հաղթահարել բոլոր դժվարություններն ու ունենալ առաջին հայկական օդապարիկը՝ մեր ազգային դրոշի գույներով:
– Օդապարիկի գրանցումն ինչպե՞ս է իրականացվում :
– Օդապարիկը համարվում է օդանավ: Ունի օդանավին հատուկ համարանիշ, ազգային գրանցում և այլն: Այսինքն՝ գրանցման գործընթացը նույնն է, ինչ սովորական ինքնաթիռի դեպքում է: Օդաչուն պետք է ունենա համապատասխան որակավորում: Ինքս սովորել եմ Ռուսաստանի Դաշնությունում, ստացել եմ միջազգային օդաչուի վկայական, որը նաև գործում է ՀՀ տարածքում:
– Լեռնային Հայաստանը որքանո՞վ է հարմար օդագնացության համար:
– Քիչ առաջ նշեցի մեզ հանդիպած խոչընդոտների մասին: Երբ դիմում էի մարդկանց, ասում էին՝ Հայաստանը լեռնային երկիր է, այստեղ անհնար է թռիչքներ իրականացնել, ռելեֆային պայմանները չեն համապատասխանում դրան: Երկու տարվա ընթացքում ապացուցեցինք, որ Հայաստանը իդեալական տարածք ունի օդագնացության համար՝ նաև եղանակային պայմանների առումով: Հայաստանը նաև աշխարհի այն եզակի երկրներից է, որտեղ հնարավոր է օդապարիկով պտտվել և վերադառնալ ելակետ. չէ՞ որ օդապարիկը կառավարվում է քամու ուղղությամբ, իսկ օդաչուն կարող է որոշել միայն բարձրության չափը:
– Հայաստանի ո՞ր վայրերն են լավագույնս համապատասխանում օդանավով թռիչքի համար:
– Տեսարանների գեղեցկության առումով իմ կարծիքով լավագույնը Գորիս քաղաքն է: Գառնու շրջանի, Ապարանի ջրամբարի տարածքները ևս շատ հարմար են օդանավով թռիչքի համար:
– Մինչ այժմ առավելագույն ի՞նչ բարձրության եք հասել օդապարիկով:
– Հայաստանում 3800 մետր ենք բարձրացել: Իսկ առհասարակ, սովորական թռիչքների ժամանակ չենք գերազանցում 1500 մետրը:
– Տարվա ո՞ր եղանականերին և օրվա ո՞ր ժամերին է հնարավոր օդապարիկով թռիչք իրականացնել:
– Օդապարիկով հնարավոր է թռչել տարվա բոլոր եղանակներին: Սակայն ամռանը հնարավոր միայն վաղ առավոտյան, արևածագից 1-2 ժամ հետո: Ձմռանը հնարավոր է թռիչք իրականացնել ողջ օրվա ընթացքում: Թռիչքին կարող է խոչընդոտել քամու բարձր արագությունը: Սպորտային թռիչքների ժամանակ մինչև 7 մետր/վայրկյան քամու արագության դեպքում է հնարավոր թռիչք իրականացնել, իսկ ժամանցի, զբոսանքի դեպքում՝ մինչև 4-5 մ/վ:
– Օդապարիկով թռիչքն անվտա՞նգ է:
– Վիճակագրության համաձայն օդապարիկը համարվում է փոքր ավիացիայի ամենաանվտանգ օդանավը: Մարդիկ արդեն երեք դար իրականացնում են թռիչքներ: Վերջերս հետաքրքիր վիճակագրության հանդիպեցի: Ըստ հետազոտության՝ այն մեկ ժամը, երբ գտնվում ես ավտոմեքենայի մեջ, մինչ թռիչքի վայր հասնելը, մոտ 120 անգամ ավելի վտանգավոր է, քան օդանավով 1 ժամ սավառնելը: Օդանավի կառուցվածքն էլ շատ պարզ է, փչանալու բան էլ չկա:
– Արդեն 2 տարի Հայաստանում գործում է օդագնացների սպորտի ֆեդերացիան: Այս ընթացքում միջազգայն մրցումների կամ փառատոների մասնակցե՞լ եք:
– Անցած տարի Ռուսաստանում՝ Վելիկիե Լուկի քաղաքում մասնակցել ենք օդագնացների 20-րդ միջազգային փառատոնին: Այս տարի մեկնելու ենք Ռոստով, որտեղ օգոստոսի 23-29-ը տեղի է ունենալու փառատոն: Ճիշտ է՝ սպորտային մասով մեր փորձը բավական քիչ է, դեռ Հայաստանում զարգացած չէ, բայց ինքներս փորձում ենք ամեն ինչ անել, որ նաև սպորտը զարգանա Հայաստանում:
– Հնարավո՞ր է, որ մի օր էլ հենց Հայաստանում միջազգային մրցում կամ փառատոն կազմակերպվի:
– Ֆեդերացիայի բացման օրից աշխատում ենք այդ ուղղությամբ: Պարզապես նման փառատոն կազմակերպելը բավական մեծ ֆինանսավորման հետ է կապված, քանի որ օդապարիկների տեղափոխումն արդեն իսկ մեծ ծախս է: Հուսով եմ, որ առաջիկա 1-2 տարում Հայաստանում հնարավոր կլինի անցկացնել միջազգային մրցումներ: Հայաստանը, որպես նոր փորձություն՝ արտերկրացի օդաչուներից շատերին է հետաքրքում:
– Քանի՞ հոգի կարող է միաժամանակ թռչել «Skyball»-ի օդապարիկով:
– Կախված է մարդկանց ընդհանուր քաշից, օրվա ջերմաստիճանից, տարվա եղանակից, ելակետի բարձրությունից, ինչպես նաև մեր ծրագրից, թե ինչ բարձրության ենք ուզում
հասնել: Հիմնականում մեր օդապարիկը նախատեսված է օդաչուի և 4 ուղևորի համար, բայց օրինակ ամռանը օդաչուի հետ կարող են թռչել 2 կամ առավելագույնը՝ 3 ուղևոր: Դա կախված է մարդկանց ընդհանուր քաշից, որը ամռանը չպետք է գերազանցի 230 կիլոգրամը: Աշխարհում կան հսկա օդապարիկներ, որոնք տեղավորում են մինչ 32 մարդու:
– Հայաստանում օդապարիկով թռիչքներին հիմնականում տեղացինե՞րն են մասնակցում, թե՞ զբոսաշրջիկները:
– Երևի թե հավասար: Հիմնականում զույգեր են մասնակցում, տղան առաջարկություն է անում երկնքում: Կամ ինչ-որ առիթ են նշում: Զբոսաշրջիկները հիմնականում ընտանիքներով են մասնակցում:
– Ուշագրավ ի՞նչ դեպքեր կհիշեք օդային ճանապարհորդություններից:
– Օդագնացությունը հետաքրքիր է նրանով, որ երբեք կրկնվող թռիչք չենք ունենում: Նույն տեղից կարող ես հարյուրավոր թռիչքներ իրականացնել և ոչ մի դեպքում նույն տեղում վայրէջք չկատարես: Հետագծերն էլ միշտ տարբեր են: Ցանկացած թռիչք յուրահատուկ է: Ինչպես նշեցի՝ բավական շատ ամուսնական առաջարկություններ են արվում երկնքում: Առավել հետաքրքիր է, երբ օրինակ աղջիկը բացարձակ տեղյակ չէ, մասնակցում է թռիչքին և ասենք՝ 1000 մետր բարձրության ժամանակ երիտասարդը առաջարկություն է անում: Նման դեպքում մենք ասում ենք, որ երաշխավորում ենք դրական պատասխանը, քանի որ փախչելու տեղ չկա (ծիծաղում է, – խմբ.):
Զրույցը՝ Գարեգին Ալեքսանյանի