ՀԱՆՈւՆ ԵՎ Ի ՇԱՀ ՀԱՅԱՍՏԱՆԻ. ՍՅՈւՆԵ ՍԵՎԱԴԱ
Այսօր մեր օրացույցում կարմիր է, տոնացույցով՝ Սահմանադրության օրը: Այսինքն՝ այսօր մեր երկրի Մայր օրենքի օրն է, օրենքի գերակայության օրը: Սակայն անցած քսաներեք տարիներին այդպես էլ հուլիսի հինգը տոնական չդարձավ: Մարդիկ այս օրն ընկալում են որպես հաճելի բոնուս՝ ամռան տապին, ոչ աշխատանքային օրվա տեսքով: Իսկ ինչո՞ւ. այս հարցին հեշտ է պատասխանել նախորդ տասնամյակների հակասական, դառը փորձով:
Ունենք հրաշալի սահմանադրություն, դրանից բխող էլ ավելի հիասքանչ օրենքներ, սակայն Հայաստանն օրենքի գերակայության երկիր չէր դառել, հետևաբար օրենսդրական ամբողջ դաշտը՝ Սահմանադրության գլխավորությամբ, մնացել էին որպես գեղեցիկ տեսություն: Շարքային քաղաքացու համար Սահմանադրությունն իր թիկունքն ու պաշտպանը չէր, ինքն օրենքի առաջ հավասար էր միայն իր նմանների համեմատ: Եվ նրանցից վեր, բառի բուն իմաստով կար մի խավ, որ օրենքից ու Սահմանդրությունից էլ վեր էր իրեն դասում, ապրում ու գործում հենց այդպես: Դրանից էլ Մայր օրենքն ուղղակի երկրի քաղաքացունը չէր, մանավանդ որ վերջին փոփոխություններով ակնհայտ տեսավ, որ դրանք որոշակի մարդկանց «հագով են արվում»: Այնպիսի տպավորություն էր, թե անցողիկը երկիրն ու Սահմանադրությունն են, այդ ուժեղ, բայց իրականում սնամեջ խավը՝ մշտական:
Այս տարվա գարնանը Հայաստանը կրկին զարթոնք ապրեց. հուսալքված, իշխանությունների հանդեպ հույս ու հավատը կորցրած ժողովուրդը միասնական պահանջատեր եղավ և թավշյա հեղափոխության արդյունքում հասանք իշխանափոխության:
Ապրիլից սկսված, մեր ժողովուրդն ականատես ու մասնակից է լինում քայլերի, որոնք բջիջ առ բջիջ, հոդված առ հոդված, Սահմանադրությունը վերադարձնում են ժողովրդին:
Մարդկանց դեմքին այսօր ժպիտ կա, այսօրվա ու վաղվա հանդեպ հույս ուակնկալիք կա և սա է ամենամեծ ձեռքբերումը: Մնացած բոլորն ածանցյալ կլինեն, բայց անպայման կլինեն, որովհետև Հայաստանի Հանրապետության քաղաքացին արդեն գիտի՝ ինչպես լինել պահանջատեր, ինչպես միակամ լինել ու հաղթել իր ներսի ցեցին:
Հայաստանը զարթոնք է ապրում՝ քաղաքական, հասարակական, տնտեսական կյանքում և մաքրում բոլոր խցանված անոթները՝ լիաթոք շնչելու համար: Բաց պատերազմ է հայտարարվել կոռուպցիային. տասնամյակներով երկրի միջոցները մսխող խոշոր խաղացողները հատիկ-հատիկ ասպարեզ են բերվում իրական լույսի ներքո: Մենք ցավով ենք համոզվում, որ մեր ամենավառ երևակայությանն անգամ գերազանցել են կոռուպցիայի իրական չափերը: Բոլորիս հիասթափությունը մեծ է, քանի որ պատերազմ հաղթած գեներալը խաղաղ կյանքում սովորական գող էր դարձել, համահայկական հանգանակությունների պետական պատասխանատուն՝ խաղամոլ՝ պետական միջոցների հաշվին, մյուսը, հաջորդը, էլի ու լի: Ցանկը շարունակելի է և արդեն իսկ խոսք է գնում, թե պետությունից գողացված, մսխված միլիարդավոր դրամներն ուր կուղղվեն:
Եվ իբրև ամփոփում մաղթում եմ ինքներս մեզ, որ այսուհետ ապրենք իրապես օրենքի և ոչ «Օրինաց երկրում»: Հենց այդպես է ծնվում իրական տոնը: Որ յուրաքանչյուր քաղաքացի խորին պատկառանք ունենա Մայր օրենքի նկատմամբ ու հուլիսի հինգը համարի իր տոնը: Մենք արժանի ենք լավագույն Սահմանադրության լավագույն իրականացման: Միասին, յուրաքանչյուրիս աշատանքով:
Շնորհավոր տոնը, որ վաղն ավելի տոնական է լինելու:
Սյունե Սևադա