ՀԱԼԵՊԻ ՇՈՒԿԱՆ ԵՐԵՎԱՆՈւՄ
Մետրոյի «Հանրապետության հրապարակ» կայարանից դուրս եկողները հայտնվում են երևանաբնակների շրջանում հայտնի «Հալեպի շուկայում»: Անուշ բուրմունքով պարուրված տարածքում ծավալվող զրույցներում արևմտահայերեն է հնչում: Հաճախորդների մոտենալուն պես սիրիահայերը ժպտում են և բարեհամբույր սպասարկում: Արդեն մի քանի տարի է, ինչ այս հատվածը պատերազմի պատճառով Սիրիայից Հայաստան տեղափոխված և մայր հայրենիքում ապաստանած հայերի փոքրիկ անկյունն է դարձել:
Տիկին Դալիթայի պատրաստած քաղցրավենիքի սրահում եմ: Արևելյան համեմունքով պատրաստված անուշեղենի համն աննկարագրելի է: Մի անգամ փորձելուց հետո համտեսողները հասկանում են, որ նորից են գալու այստեղ:
Տաղավարներից մեկում տարատեսակ համեմունքներ են վաճառվում, բնական խնամքի միջոցներ, մյուսում` կոշիկ ու հագուստ:
«Հալեպի շուկայում» երկու վարսավիրանոց է գործում` Գևորգինն ու Րաֆֆիինը, սննդի կետ կա` Հալեպի սենդվիչներով ու լահմաջոյով: Քաղաքին նոր շունչ հաղորդած սիրիահայ մեր հայրենակիցների ադապտացումը նորմալ է ընթանում:
Հանգամանքների բերումով տնանկ դարձած մեր հայրենակիցներին օժանդակելու ձևերից մեկն էլ՝ «Հալեպի շուկայում» հաճախակի հայտնվելն է: Այստեղ այցելողները որպես կանոն կրկին են վերադառնում…
Արև Մախսուդյան