ԳԱՐՈՒՆ»-Ը ՆՈՐ ԳԱՐՈՒՆՆԵՐ Է ԲԵՐԵԼՈՒ
Մեկամյա ընդմիջումից հետո լույս է տեսել «Գարուն» ամսագրի` 2016թ. առաջին համարը: Ամսագրի խմբագիր Աշոտ Գաբրիելյանի վստահեցմամբ՝ նոր խմբագրակազմն անելու է ամեն ինչ ոչ միայն ամսագրի լավագույն ավանդույթները պահպանելու, այլեւ ժամանակին համընթաց քայլելու ուղղությամբ: Այս տարվա առաջին համարում տեղ են գտել անկախության սերնդի շուրջ 30 հեղինակների ստեղծագործություններ, թարգմանություններ:
– Տիգրան Պասկևիչյանի, Հովիկ Չարխչյանի, Մհեր Արշակյանի ու այլ հեղինակների գործեր կան, թարգմանություններ Վիրջինիա Վուլֆից, Զորայր Խալափյանի անտիպ նյութերից ենք տպագրել այս համարում… 80 էջի մեջ փորձել ենք խտացնել «Գարուն»-ի ավանդույթները: Մենք փորձելու ենք նաև գրական բանավեճեր հրահրել, որոշակի հարցադրումներ առաջ քաշել և փորձել գտնել նաև պատասխանները,- ասում է Աշոտ Գաբրիելյանը:
Ամսագիրը հրատարակվել է 500 օրինակով, գրասեր հանրությունն այն կարող է ձեռք բերել բոլոր կրպակներից: Մինչև տարեվերջ նախատեսվում է ևս 3 համար հրատարակել, որոնցում մեծ տեղ է հատկացվելու հատկապես հրապարակախոսությանը: Նպատակը մեկն է՝ համացանցի դարում, երբ ցանկացած գաղափար արագ տեղ է գտնում սոցիալական ցանցերում, զարգացնել հրապարակախոսության մշակույթը Հայաստանում:
– Ցավոք, մեր երկրում բավականին նվազել են այն հարթակները, որտեղ մեր հրապարակախոսները կարող են արտահայտվել: Մենք փորձելու ենք լրացնել այդ բացը, մատուցել թարմ և արդիական հրապարակախոսություն,- ասում է խմբագրական խորհրդի անդամ Արամ Անանյանը:
«Գարունը» նոր գարուններ է բերելու հայ իրականություն, համոզված են խմբագրական խորհրդի անդամները, որոնց միակ նպատակը՝ շնչող, դինամիկ, մաքուր հայերենով ամսագիր ստեղծելն է, որը կհաղթահարի առկա խոչընդոտներն ու անգամ տասնամյակներ անց չի կորցնի իր արդիականությունը: Երբ մենք թերթում էինք «Գարուն»-ի արխիվը, այնպիսի գանձեր էինք հայտնաբերում, որ զարմանում էինք: «Գարուն»-ի մեծությունը հենց դրանում էր, որ 60-ականների համարներն էլ այսօր արդիական են,- նկատում է Արամ Անանյանը:
Տաթևիկ Սարգսյան