ԷԿՈՏԱՂԱՎԱՐ՝ ՀՅՈւՍԻՍԱՅԻՆ ՊՈՂԱՏԱՅՈւՄ
«Հայաստանում կա ավելի քան 3800 բուսատեսակ, որոնցից 144-ը աճում է միայն Հայաստանում», «Հայաստանի 4-7 %-ը կազմում է ջուրը»․ Հյուսիսային պողոտայի էկոտաղավարում փակցված պաստառներն են հուշում՝ հետաքրքրելով մարդկանց, որոնք հետաքրքրությամբ մոտենում ու ուսումնասիրում են տաղավարը։
Սեպտեմբերի 18-28-ը Հյուսիսային պողոտայում (ցայտաղբյուրների հարակից տարածքում) կգործի էկոտաղավար, որը հնարավորություն է տալիս տեսնելու, թե ինչ տեսք կունենա մեր կենցաղը՝ եթե կիրառենք այսօրվա բնապահպանական միտումները: Երկաթե դեղին ձողերով և պաստառներով հավաքված շինության մեջ կարելի է տեսնել վերաօգտագործված պլաստիկից պատրաստված կահույք, վերալիցքավորել բջջային հեռախոսն արևային վահանակից, իսկ տարածքում գտնվող մասնագետները սիրով կպատասխանեն հարցերին, նրանց օգնությամբ հետաքրքրվածները կարող են էկոպաստառներին ծանոթանալ, անցնել էկոգրագիտությունը ստուգող թեստ և հաջողելու դեպքում՝ նվերներ ստանալ։
Այսօր էկոտաղավարի բացման միջոցառմանը ներկա էր նաև ՀՀ բնապահպանության նախարար Էրիկ Գրիգորյանը և Հայաստանում ՄԱԿ-ի մշտական համակարգողի, ՄԱԶԾ մշտական ներկայացուցչի ժամանակավոր պաշտոնակատար Դմիտրի Մարիասինը: Ճեպազրույցի ընթացքում նախարարը և Դմիտրի Մարիասինը ներկայացրին արշավի շրջանակում նախատեսվող բնապահպանական միջոցառումները և շփվեցին լրագրողների հետ՝ առանձնահատուկ կարևորելով նման նախաձեռությունն ու խոստանալով, որ ՄԱԿ-ի հետ համագործակցությունը շարունակական կլինի։
Բացի Հյուսիսային պողոտայում կառուցած էկոտաղավարից լինելու են նաև ֆիլմերի ցուցադրություններ։ Երկիր մոլորակի ամենակարևոր խնդիրների մասին պատմող երեք ֆիլմերը հնարավոր կլինի դիտել «Թումո» կենտրոնում։ Այսօր՝ սեպտեմբերի 18-ին ցուցադրվելու է «Փրկել մոլորակը» ֆիլմը, որտեղ աշխարհահռչակ դերասան Լեոնարդո Դի Կապրիոն շրջում է աշխարհով ու ներկայացնում բնապահպանական խնդիրները։ Ֆիլմի դիտումը ժամը 19:00-ին է, մուտքը՝ անվճար։
Սյունե Սևադա
Լուսանկարները՝ Սամվել Բերքիբեկյանի