ԱՄՆ ԱՆԿԱԽՈՒԹՅԱՆ 240 ԱՄՅԱԿԸ ՀԱՅԱՍՏԱՆՈՒՄ
Հայաստանում ԱՄՆ-ի դեսպանատունը մեծաթիվ հյուրերի ընկերակցությամբ տոնում էր Միացյալ նահանգների անկախության օրը: Երկրորդ մայրցամաքային կոնգրեսի կողմից 240 տարի առաջ՝ 1776 թվականին է ճանաչվել ԱՄՆ-ի անկախությունը Մեծ Բրիտանիայից:
Երևանում ԱՄՆ-ի դեսպանատան կազմակերպած միջոցառմանը լրագրողները ամենաառաջինն էին հրավիրված: Միջոցառմանն ամենասկզբից ներկա լինելը մեզ հնարավորություն տվեց ունկնդրել դեսպան Ռիչարդ Միլսի օգնականների 1.5 ժամանոց ողջույնի արարողությունը:
Հրավիրված 1500 հյուրերի մեծ մասին դեսպանն ու օգնականները անձամբ բարևեցին, լուսանկարվեցին նրանց հետ, զրուցեցին: Արդեն բոլոր հյուրերի ներկայությամբ, կառուցված բեմից դեսպան Ռիչարդ Միլսը նշեց, որ այս տարվա տոնակատարության առանցքում ամերիկյան մշակութային բազմազանությունն է, որ ներկայացվում է երկրի տարբեր շրջանների ուտեստների ներկայացմամբ:
«Հարուստ ու բազմազան է մեր երկիրը: Այնտեղ, ինչպես խառնարանում, մեկտեղված են աշխարհի տարբեր մշակույթները, որոնցից ամեն մեկն իր համն ու հոտն է պարգևում այն արդյունքին, որը կոչում ենք Ամերիկա»,- նշեց դեսպանը: Երեկոյի պատվավոր հյուրն էր ՀՀ վարչապետ Հովիկ Աբրահամյանը: Շնորհավորանքից հետո վարչապետը հիշեց, որ Հայաստանի անկախության հռչակումից հետո ԱՄՆ-ն առաջին երկիրն էր, որ դեսպանություն հիմնեց Երևանում: «Մենք մեծապես կարևորում ենք Միացյալ Նահանգների հետ մեր բարեկամությունը, և ուրախ ենք, որ համատեղ ջանքերով երկկողմ գործընկերությունը բարձրացրել ենք որակապես նոր մակարդակի: Ամերիկյան ժողովուրդը խորապես արժևորում է այս տոնը, քանի որ ոչ միայն նվաճել է իր անկախությունը գաղութատիրական կարգերի դեմ պայքարելով, այլև կիսում է այն արժեքները, որոնք նշված են ԱՄՆ անկախության հռչակագրում: Այդ արժեքները համամարդկային են և կարևոր էին ոչ միայն 240 տարի առաջ, այլ նաև այժմ: Հայ ժողովուրդը ևս իր անկախության հռչակումը սկսել է այդ սկզբունքներին հավատարմություն հաստատելով: Մենք երախտապարտ ենք ԱՄՆ կառավարությանը և ժողովրդին՝ Հայաստանի անկախացումից ի վեր ցուցաբերած մարդասիրական և տեխնիկական անգնահատելի օժանդակության համար», ամփոփեց վարչապետը: Պաշտոնական մասից հետո բեմը տնօրինեցին Հայաստանի պետական ջազ նվագախումբն ու միջոցառման հատուկ հյուր, ամերիկյան ջազ երգչուհի Շերոն Քլարկը: Երեկոն ավարտվեց շքեղ հրավառությամբ: