ԱՄԱՌԱՅԻՆ ՖՈւՏԲՈԼԱՅԻՆ ԱՌՈւԾԱԽ
Եվս 10-15 օր և խոշոր ակումբների ֆուտբոլիստների համար արձակուրդը կավարտվի ու նրանք կսկսեն նախապատրաստվել նոր մրցաշրջանին: Այս ընթացքում, սակայն, ակումբների մենեջերները, մարզիչները, ֆուտբոլային գործակալների հետ աշխատող մարդիկ բնավ էլ ձեռքերը ծալած չեն նստել: Այժմ նրանց գործունեության ամենաթեժ շրջանն է` ամառային տրանսֆերային պատուհանը: Հենց այս ժամանակահատվածում է ՈւԵՖԱ-ն թույլատրում ֆուտբոլիստների վաճառքը կամ տեղափոխությունը մի ակումբից մյուսը: Տրանսֆերային շուկայում, վերջին տարիներին հատկապես, մեծ գումարներ են ծախսում մանչեսթերյան ակումբները: Նրանք խոշոր գումարներ են վճարում հիմնականում երիտասարդ, բայց արդեն մեծ փորձ ունեցող ու իրենց դրսևորած 22-24 տարեկան ֆուտբոլիստների դիմաց: Ստորև ներկայացնում ենք առայժմ կայացած ամենաթանկարժեք տրանսֆերները:
Ջորդան Պիքոֆորդ (դարպասապահ, 23 տարեկան) – «Սանդերլենդից»` «Էվերթոն» – 28.5 միլիոն եվրո,
Մայքլ Քին (պաշտպան, 24 տարեկան), «Բյորնլիից»` «Էվերթոն» – 28.5 միլիոն եվրո,
Միլան Շկրինյար (պաշտպան, 22 տարեկան), «Սամպդորիայից»` «Ինտեր» – 30 միլիոն եվրո,
Թեո Հերնանդես (պաշտպան, 19 տարեկան), «Ատլետիկոյից»` «Ռեալ Մադրիդ» – 30 միլիոն եվրո,
Վիկտոր Լինդելֆ (պաշտպան, 22 տարեկան), «Բենֆիկայից»` «Մանչեսթեր Յունայթեդ»– 35 միլիոն եվրո,
Անդրե Սիլվա (հարձակվող, 22 տարեկան), «Պորտուից»` «Միլան» – 38 միլիոն եվրո,
Էդերսոն (դարպասապահ, 23 տարեկան), «Բենֆիկայից»` «Մանչեսթեր Սիթի»– 40 միլիոն եվրո,
Կորենտեն Տոլիսո(կիսապաշտպան, 22 տարեկան), «Լիոնից»`«Բավարիա» – 41.5 միլիոն եվրո,
Մուհամեդ Սալահ (կիսապաշտպան, 25 տարեկան), «Ռոմայից»`«Լիվերպուլ» – 42 միլիոն եվրո,
Բերնարդու Սիլվա (կիսապաշտպան, 23 տարեկան), «Մոնակոյից»` «Մանչեսթեր Սիթի» – 50 միլիոն եվրո,
Ալեքսանդր Լաքազետ (հարձակվող, 26 տարեկան), «Լիոնից»` «Արսենալ» – 53 միլիոն եվրո, Ռոմելու Լուկակու(հարձակվող, 24 տարեկան), «Էվերթոնից»` «Մանչեսթեր Յունայթեդ» – 75 միլիոն ֆունտ ստելինգ, ինչպես նաև Ուեյն Ռունիի անվճար տրանսֆերը հակառակ ուղղությամբ: