ԱԲԲԱՍ ՔԻՌՈՍԹԱՄԻ. ԺԱՄԱՆԱԿԱԿԻՑ ՊՈԵԶԻԱ
Մի ամբողջ կյանք թողնում եմ ետևում,
Մի ակնթարթում
Լալիս եմ ինքս ինձ վրա…
***
Շարունակ անավարտ է մնում
Իմ խոսքը
Ինձ հետ…
***
Շարունակ ինչ-որ մեկի հետ
Ժամադրված եմ,
Որ չի գալիս…
Նրա անունը չեմ հիշում:
***
Լացը հանգիստ չի տալիս,
Երբ
Տեղ չկա արտասվելու համար…
***
Գալիս եմ՝ միայնակ,
Խմում եմ՝ միայնակ.
Ծիծաղում եմ՝ միայնակ,
Լալիս եմ՝ միայնակ,
Գնում եմ՝ միայնակ…
***
Եկել եմ քամու հետ միասին՝
Ամռան առաջին օրը,
Քամին ինձ կտանի իր հետ՝
Աշնան վերջին օրը…
***
Հիմա որտե՞ղ է,
Ի՞նչ է անում
Նա՝ ում մոռացել եմ…
Թարգմանությունը պարսկերենից՝ Էդուարդ Հախվերդյանի
