7 ՀԱՐՑ. ՍՈՒՐԵՆ ՍԱՐՈՒՄՅԱՆ
7 Հարց խորագրի հյուրն է գրող, ռազմական փորձագետ Սուրեն Սարումյանը:
– Ի՞նչ արժեք (կառույց, ավանդույթ կամ մեկ այլ բան) կուզեիք «հայաֆիկացնել»:– Որքան էլ տարօրինակ հնչի՝ «կհայաֆիկացնեի» մեր մեծագույն արժեքը՝ հայոց լեզուն՝ այն մաքրելով օտարաբանություններից ու ժարգոնից, իսկ համացանցային տիրույթում նաև՝ լատինատառ գրելու համախտանիշից:
– Եթե Դուք լինեիք Երևանի քաղաքապետը, ո՞րը կլիներ ձեր առաջին հանձնարարականը:– Առաջինն ինչ կանեի՝ փողոցներում արդեն չտեղավորվող մեքենաների հոսքի կառավարմանը միտված խելամիտ լուծումը կլիներ: Միջազգային հաջողված փորձի ուսումնասիրությունից հետո, իհարկե: Սա ենթադրում է հասարակական տրանսպորտի որակի բարելավում և կայանման տուրքերի այնպիսի համակարգի ներդրում, երբ առավել հարմար ու շահավետ կլինի տրանսպորտով երթևեկելը:
– Թվարկեք երեք քայլ, որոնք կնպաստեին հայրենադարձությանը:-Հավասար ու արդար պայմաններ բոլորի համար, օրենքի բացարձակ գերակայություն կյանքի բոլոր ոլորտներում, հայկական երազանքի առկայություն:
-Հայոց պատմության ողջ ժամանակահատվածի 3 ամենալուսավոր կերպարները՝ Ձեր դիտարկմամբ:– Պապ թագավոր, Գրիգոր Նարեկացի, Գարեգին Նժդեհ:
– Հայոց պատմության ո՞ր էջը կսրբագրեիք:– Մեր պատմության մեջ, ցավոք, կան բազմաթիվ էջեր, որոնք կարելի է սրբագրել: Եթե այդ հնարավորությունը սահմանափակենք վերջին տասնամյակների պատմությամբ, թերևս կսրբագրեի 1996 թվականի նախագահական ընտրությունները:
– Ե՞րբ և ի՞նչն է վերջին անգամ Ձեզ զարմացրել:– Ինձ ամեն օր զարմացնում է կինս, ով հաջողացնում է նույն պահին մտածել ու ասել այն, ինչը մտածում ու ցանկանում եմ ասել ես:
– Արդյունքի, հաղթանակի հասնելու Ձեր բաղադրատոմսը:– Համառ աշխատանք՝ զուգակցված անհաջողություններից չհուսալքվելու կարողության հետ:
