7 ՀԱՐՑ. ԿԱՐՄԵՆ ԹՈՍՈւՆՅԱՆ
Խորագրի հյուրն է Հայաստանի ազգային ֆիլհարմոնիկ նվագախմբի կոնցերտմայստեր Կարմեն Թոսունյանը:
– Ձեր կողմից բացահայտված ամենածածուկ, շատերին անծանոթ անկյունը Հայաստանում:– Այս տարի ընտանիքով հանգստանում էինք Աղվերանում: Մեզ համար հետաքրքիր բացահայտում էր հյուրանոցից ոչ հեռու գտնվող Արզականի եկեղեցին` 1207 թվականին կառուցված Սուրբ Աստվածածինը: Նրանից այժմ միայն փլատակներ են մնացել: Մեկուսի, անտառապատ տեղում կառուցված եկեղեցու գոյության մասին շատերը չգիտեն, բայց ես, ամուսինս և բալիկս երկար փնտրեցինք և գտանք: Առեղծվածային և հետաքրքիր անկյուն է:
– Կա՞ մի բան Երևանում, որն անասելի նյարդայնացնում է Ձեզ:– Հին շենքերի քադումն ու նրանց տեղում զանգվածեղ շինությունների կառուցումը: Հին կառույցներն ինձ ավելի են դուր գալիս: Նյարդայնացնում է նաև մեր ճանապարհների անհարմարությունը, մեքենաների քանակի ավելացմամբ պայմանավորված շարունակական խցանումները:
– Հենրիխ Մխիթարյանից, դուդուկ- ծիրան- խորովածից բացի, ինչը կարող էր մեր այցեքարտը դառնալ աշխարհում։– Եթե մենք մեր հանգստյան վայրերն ավելի բարելավենք, ինչպես ժամանակին Սաակաշվիլին արեց Վրաստանում, Հայաստան ժամանող մարդիկ Երևանից դուրս նույնպես կգնան: Կբացահայտեն ոչ միայն հայտնի տեսարժան վայրերը, այլև` գողտրիկ անկյունները, որոնց հանրամատչելիացման մասին պետք է մտածել:
– Նշեք Ձեր աշխարհընկալման վրա նշանակալի ազդեցություն ունեցած երեք գրքի անուն:– Պատանեկության տարիներին կլանված էի ռուսական գրականությամբ` Լև Տոլստոյ, Ալեքսանդր Պուշկին… Դժվարանում եմ առանձնացել, ռուսական գրականությունն ընդհանրապես մեծ ազդեցություն է թողել իմ աշխարհընկալման վրա: Փոքր-ինչ ուշ ծանոթացել եմ նաև հայկական գրականությանը, որը նույնպես հրաշալի է: Ալեքսանդր Շիրվանզադեի «Քաոսը» շատ տպավորիչ է:
– Մերօրյա ընդօրինակելի մարդկանց անուններ կարո՞ղ եք նշել։– Շատ եմ գնահատում այն մարդկանց, ովքեր չունենալով ոչինչ, ձգտում են հաջողություների, կյանքում մի բանի հասնելու, ստեղծելու:
– Հնարավորություն ունենալու դեպքում ի՞նչ կկառուցեիք Երևանում։– Նոր համերգասրահ կկառուցեի: Պարզապես երազում եմ: Օպերայի այս շենքը մեզ չի բավարարում: Մեր դահլիճում ակուստիկան շատ վատն է: Մի քանի անգամ դիմել ենք Թամանյանի թոռանը: «Երկու ոտքը մի կոշիկի մեջ դրած» նա ոչինչ ձևափոխված տեսնել չի ուզում: Գուցե հարկ կա ճապոնացի, չինացի մասնագետների հրավիրել, ովքեր հնչողության բարելավման համար դահլիճում ինչ-որ բան կավելացնեին: Արտերկրյա տարբեր դահլիճներում մեր նվագախումբի անդամներն իրար ավելի լավ են զգում ու հասկանում, քան այստեղ: Փողայիններն, օրինակ, լարայիններին լավ չեն լսում, դրան հակառակ նրանց ձայնը մեզ համար անասելի բարձր է… բալանսը նորմալ չէ: Չունենք փորձի համար նախատեսված սենյակներ, որտեղ կկարողանայինք գործից հետո պարապել: Չէ որ շատ հաճախ տանն էլ հնարավոր չէ պարապել, հատկապես փողայինների դեպքում, հարևանները պարզապես ոստիկանություն կկանչեն(ժպտում է,-խմբ.):
– Շոգից փրկվելու Ձեր «բաղադրատոմսը»։– Տարբերակ չկա: Որքան էլ տանը օդորակիչ միացնես, միևնույն է` լուծում չէ: Պետք է դիմանալ եղանակին, որովհետև ոչ մի բան հավերժ չէ (ծիծաղում է,- խմբ.):