7 ՀԱՐՑ. ԲՈՐԻՍ ՔՈՉԱՐՅԱՆ
Խորագրի հյուրն է ճարտարապետ, Հայաստանի ճարտարապետների միության քարտուղար, ճարտարապետության և շինարարության Հայաստանի ազգային համալսարանի դասախոս Բորիս Քոչարյանը:
– Ձեր կողմից բացահայտված ամենածածուկ, շատերին անծանոթ անկյունը Հայաստանում:
– Չունեմ, ճիշտն ասած: Հայաստանում ծածուկ տեղ դժվար է գտնել: Այնուամենայնիվ, մոտ 30 տարի առաջ, ինձ համար հայտնություն էր Մեղրին: Մինչ այդ թվում էր, թե Հայաստանում ամեն ինչ տեսել եմ: Մեղրին արտակարգ է` իր արևադարձային մրգերով, տարածքի տեղադրվածությամբ: Քաղաքի կանաչը գալիս-գալիս է և կարծես քանոնով կտրում ես վերևից: Շատ հետաքրքիր քաղաք է:
– Կա՞ մի բան Երևանում, որն անասելի նյարդայնացնում է Ձեզ:
– Ցավոք, շատ են: Օրինակ` սարսափելի աղմուկը: Համակեցության ոչ մի կարգ ու կանոն չունեցող քաղաքի տպավորություն է թողնում: Գիշերային ժամերին առանց խլացուցիչ մեքենա են վարում կամ հրավառություն կազմակերպում: Շատ աղմկոտ և կեղտոտ քաղաք է դարձել Երևանը:
– Հենրիխ Մխիթարյանից, դուդուկ- ծիրան- խորովածից բացի, ինչը կարող էր մեր այցեքարտը դառնալ աշխարհում։
– Մենք միշտ էլ աշխարհին մեր անհատներով ենք ներկայացել, դրա համար էլ բոլորվին ինձ վատ չեմ զգում, որ մենք Հենրիխ Մխիթարյանի անունով ենք աշխարհին ներկայանում: Մյուս կողմից, արդեն ժամանակն է, որ մեր պետությունն աշխարհին ներկայանա հենց իր տարածքով, ներքին կյանքի կազմակերպման որակով: Կարծում եմ` շատերիս ցանկությունն է:
– Նշեք Ձեր աշխարհընկալման վրա նշանակալի ազդեցություն ունեցած երեք գրքի անուն:
– Կնշեմ ըստ հերթականության, փուլերով: 8-րդ դասարանում ձեռքս ընկավ Նիկոլայ Կունի «Հին Հունաստանի լեգենդներն ու առասպելները» գիրքը: Հավանաբար մեկ ամբողջ տարի այդ գրքի ազդեցության տակ էի: Ուսանող ժամանակ ընկերներով ճարել էինք Հիպոլիտ Տենի «Արվեստի փիլիսոփայությունը», որն իրարից խլելով կարդում էինք: ԽՍՀՄ տարիներին դժվար էր ճարել, բայց ինստիտուտն ավարտելուց հետո կարդացի «Աստվածաշունչը» և և ոչ մեկ անգամ: Փաստորեն մեր ամբողջ քաղաքակրթության հիմքն է այնտեղ: Բովանդակությանը,սյուժեին ծանոթ չլինելու դեպքում շատ դժվար է դասական նկարիչների գործերը հասկանալը, որոնց կտավներում գերազանցապես աստվածաշնչյան թեմաներ են:
– Մերօրյա ընդօրինակելի մարդկանց անուններ կարո՞ղ եք նշել։
– Մի քիչ դժվար է ժամանակակիցներին գնահատելը: Կարծում եմ` միշտ էլ կան ընդօրինակման արժանի մարդիկ: Ինձ վրա ազդեցություն թողած մարդկանցից կարող եմ նշել` Ջիմ Թորոսյանի, Ռոմեո Ջուլհակյանի, Մարտին Միքայելյանի, Մարտուն Գրիգորյանի անունները: Մարդիկ, որոնք հետք են թողել իմ մտածողության վրա:
– Հնարավորություն ունենալու դեպքում ի՞նչ կկառուցեիք Երևանում։
– Այգի, զբոսայգի, հանրային լուրջ տարածքներ, մշակված քաղաքակիրթ պուրակ: Երևանի հանրային տարածքները գրեթե ամբողջությամբ մասնավորեցվել, ոչնչացվել են:
-Ձեզ համար ո՞րն է անկախության խորհրդանիշը:
– Անկախությունը պայմանավորված է ինքնուրույն որոշումներ կայացնելու հնարավորությամբ, այլ կերպ՝ պետության առկայությամբ:
