7 ՀԱՐՑ. ԱՐԱ ՊԵՏՐՈՍՅԱՆ
Խորագրի հյուրն է «Արտլաբերևան» քաղաքական արվեստի խմբի անդամ Արա Պետրոսյանը:
– Ի՞նչ արժեք (կառույց, ավանդույթ կամ մեկ այլ բան) կուզեիք «հայաֆիկացնել»: – Հայաստանում կցանկանայի տեսնել օրինական աշխատանք՝ ոստիկանության, դատական համակարգի կողմից:
– Եթե Դուք լինեիք Երևանի քաղաքապետը, ո՞րը կլիներ ձեր առաջին հանձնարարականը: – Բազմաթիվ սրճարաններ կքանդեի և նրանց տարածքում ծառեր կտնկեի: Արդեն անհնար է ապրել ցեմենտի և բետոնի մեջ. խեղդվում ենք:
– Թվարկեք երեք քայլ, որոնք կնպաստեին հայրենադարձությանը: – Առաջին հերթին` իշխանափոխություն, երկրորդ` պայմանների ապահովում, որ վերադարձողներին այստեղ չնեղացնեն, լինեն նրանք գործարար, թե՝ արվեստագետ: Երրորդ` հանդուրժողականություն` թե՛ ուրիշ ազգերի, թե՛ մեր` հայերիս նկատմամբ: Տոլերանտություն` ուրիշ ավանդույթների, սովորույթների, մեզանից տարբերվող մարդկանց նկատմամբ: Մեզ մոտ մեծամասնությունից տարբերվող մարդկանց դժվար են ընդունում:
-Հայոց պատմության ողջ ժամանակահատվածի 3 ամենալուսավոր կերպարները՝ Ձեր դիտարկմամբ: – Արթուր Սարգսյանը` «Հաց բերողը», Շանթ Հարությունյանը և Կոմիտասը:
– Հայոց պատմության ո՞ր էջը կսրբագրեիք: – Ցեղասպանության էջը, որը վատ ազդեցություն է ունեցել մեր հոգեբանության վրա:
– Ե՞րբ և ի՞նչն է վերջին անգամ Ձեզ զարմացրել: – Ինձ անընդհատ զարմացնում է մարդկանց կարճ հիշողությունը: Այս օրերին էլ մարդիկ մասնակցում են «բարեգործների» հավաքներին, և հավանական է, որ 10-20 հազար դրամի դիմաց վաճառեն իրենց ձայնը:
– Արդյունքի, հաղթանակի հասնելու Ձեր բաղադրատոմսը: – Եթե կարճ ասեմ` հեղափոխությունը…
Լուսանկարը՝ Ադրինե Գրիգորյանի