«ՄԵԹՈԴԱԿԱՆ» ՕԳՆՈՒԹՅՈՒՆ ԲԿԼԻԿՆԵՐԻՆ
Աշինանոց տեմպերով զարգացող տեղեկատվական տեխնոլոգիաների ոլորտը նորանոր հնարավորություններ է ընձեռում հանրությանը։ Հայաստանում գործող երիտասարդ, խանդավառ ու ստեղծագործ ծրագրավորողներից շատերը հանդես են գալիս հետաքրքիր ու խիստ յուրօրինակ առաջարկներով: Այդ երիտասարդներն իրենց հիմնական աշխատանքից զատ, իրականացնում են տարատեսակ նախագծեր ։ Ծրագրավորողների մի խումբն,օրինակ, համընթաց շարժվող մարդկանց համար բջջային հավելված է ստեղծում, մեկ այլ խումբ Երևանի հեծանվային առցանց քարտեզն է գծում, ծրագրավորողների երրորդ խումբն էլ փորձում է նոր նախագծի միջոցով ի հայտ բերել խոհարարական հմտություններով օժտված անհատների՝ նրանց հնարավորություն ընձեռելով մեր համաքաղաքացիների համար պատրաստել համեղ տնական ուտեստներ։ Մայիս ամսին գործարկված «Narinj.am » ծրագիրը համացանցում մեկտեղել է ավելի քան 150 խոհարարի։ Խոհարարները չունեն բիզնես և աշխատում են տնային պայմաններում։ Այս հետաքրքրաշարժ նախաձեռնության մասին է «Ճամփորդ»-ի զրույցը ձեռնարկի համահեղինակ՝ Արամ Կիրակոսյանի հետ։
– Ե՞րբ է ստեղծվել «Narinj. am» հարթակը, ո՞վքեր են նախաձեռնողները և որն է գործունեության հիմնական նպատակը:
– Նախագծի վրա սկսել ենք աշխատել այս տարվա սկզբից: Աշխատում ենք ծրագրավորողների 6 հոգանոց թիմով: Տեխնիկական մասի վրա ինձանից բացի աշխատում են Վահան Գևորգյանն ու Կարինե Գասեսյանը , իսկ կազմակերպչական հարցերով զբաղվում են Գոռ Հովսեփյանը, Վահան Գրիգորյանը և Հրանտ Խոնդրակյանը: Բոլորին է հայտնի, որ Հայաստանում կան շատ տնային տնտեսուհիներ , ովքեր կարողանում են համեղ պատրաստել: Այդ մարդկանցից շատերը,սակայն, չունեն եկամտի աղբյուր: Մեր նպատակը նման մարդկանց՝ իրենց աշխատանքի շնորհիվ գումար վաստակելու հնարավորություն տալն է: Պատկերն ամբողջացնելու համար նշեմ նաև, որ քիչ չեն այն մարդիկ, որոնք ցանկանում են ուտել տնական ուտեստներ, բայց չունեն դրա պատրաստման ժամանակն ու հնարավորությունը: Մեր ստեղծած հարթակը հնարավոր է դարձնում նշված երկու խմբի համագործակցությունը:
– Մինչ այժմ քանի՞ խոհարար է միացել ձեզ: Ի՞նչ աշխատանքային գրաֆիկով են աշխատում խոհարարները:
– Ներկա պահին աշխատում ենք 5 խոհարարի հետ, սակայն համակարգում գրանցվել է 150-ից ավել խոհարար: Խոհարարներն աշխատում են ազատ գրաֆիկով: Կայքում ցուցադրվում են միայն այն խոհարարների ուտեստները, որոնք այդ պահին աշխատում են: Ուտեստների տեղափոխման համար մենք խոհարարներին տրամադրում ենք համապատասխան տարաներ և կազմակերպում ենք առաքումն անմիջապես խոհարարի տանից: Այսինքն՝ խոհարարարը զբաղվում է միայն ուտեստի պարտրաստմամբ:
– Ի՞նչ սկբունքով են ընտրվում խոհարարները: Ո՞վ կարող է դառնալ խոհարար «Narinj.am»-ում: Նրանք բոլորն աշխատում են տնայի՞ն պայմաններում:
– Մեզ համար կարևորը սննդի որակն ու մաքրությունն է, այսինքն խոհարարը պետք է ունենա համապատասխան սանիտարահիգիենիկ պայմաններ: Շուտով կայքում ավելացնելու ենք գնահատման համակարգ, ինչի միջոցով կկարողանանք վերահսկել որակը, ցածր գնահատվող խոհարարներն ուղղակի կհեռացվեն համակարգից: Մեր սկզբունքներից մեկն է, որ բոլոր խոհարարներն աշխատեն տնային պայմաններում։ Ունեցել ենք առաջարկներ խոհարարներից, ովքեր ցանկացել են աշխատել ռեստորանում և առաքումն անել այնտեղից, սակայն մերժել ենք, քանի որ դրա համար կան այլ հարթակներ:
– Ո՞ր ուտեստներն են ամենապահանջվածը: Առկա խոհանոցը հայկակա՞ն է, թե՞ խառը:
– Կայքում ներկա պահին ներկայացված է 100-ից ավել ուտեստ: Ամենապահանջվածները հիմա լանչերն են: Յուրաքանչյուր խոհարար ինքն է առաջարկում իր ճաշացանկը, ինչի շնորհիվ էլ մեզ մոտ խոհանոցը բազմազան է և չի սահմանափակվում միայն հայկականով։
– Ինչպես է գործում պատվերի և առաքման համակարգը: Արդյոք պատվիրատուն օգտվում է բջջային որևէ հավելվածի՞ց, թե՞ պարզապես զանգահարում է:
– Պատվիրել հնարավոր է կայքով կամ զանգահարելով մեր հեռախոսահամարով, առաջիկայում նախատեսում ենք ստեղծել նաև բջջային հավելվածներ։ Պատվերը մեր կողմից հաստատվելուց հետո, այն ուղարկվում է խոհահարին։Դրանից հետո արդեն խոհարարին տրամադրում ենք բջջային հավելված, որի միջոցով նա ընդունում է պատվերները: