ՄԵՆՔ ՁԱԽԼԻԿ ԵՆՔ, ԲԱՅՑ ՈՉ՝ ՁԱԽՈՐԴ
1976 թվականից ի վեր օգոստոսի 13-ը համարվում է ձախլիկների միջազգային օրը, որի բուն նպատակն է մարդկանց մեջ ամրապնդել այն համոզմունքը, որ ձախլիկ լինելու մեջ սխալական ոչինչ չկա, դա բնական ու կենսաբանական բոլոր չափորոշիչներին համապատասխան «շեղում» է: Փաստորեն, միայն Սովետ միությունը չէր, որ ստիպողաբար ձախլիկներին աջլիկ էր դարձնում՝ ամբողջովին խեղաթյուրելով երեխաների հավասարակշռությունը՝ բառի ամենաուղիղ իմաստով. վաղուց ապացուցված փաստ է, որ այն մարդիկ, որոնք ձախ ձեռքը փոխարինել են աջով, դժվար են կողմնորոշվում բաց տարածության մեջ: Բացի դրանից, երեխաների մոտ բարդույթներ են ձևավորվում, նրանց թվում է, որ ի սկզբանե «թարս» են ծնվել, դրա համար էլ հիմա նրանց «ուղղել» է պետք: Արդյո՞ք կարիք կա նման սթրեսի ենթարկել մարդկանց՝ առանց որևէ հիմնավոր պատճառի:
Կրկին հորդորում ենք՝ ոչ մի պարագայում չփոխել երեխայի ակտիվ ձախ ձեռքը աջի, քանի որ բացի վնասից դա ոչ մի օգուտ չի բերելու: Մի մոռացեք, որ ձախլիկների մեջ տաղանդավոր մարդիկ շատ են, և դա նույնպես պատահական չէ, քանի որ ձախլիկների մոտ ավելի զարգացած է գլխուղեղի այն հատվածը, որը պատասխանատու է արվեստի, ստեղծագործ լինելու համար: Հայտնի ձախլիկներից են Հուլիոս Կեսարը, Ալեքսանդր Մակեդոնացին, Ուինսթոն Չերչիլը, Մահաթմա Գանդին, Բարակ Օբաման, Պաբլո Պիկասսոն, Ռուբենսը, Չարլի Չապլինը, Ջեյմս Քեմերոնը, Բոբ Դիլանը, Սթինգը, Կուրտ Քոբեյնը…Շարքը երկար է շարունակվում: Ձախլիկները ձախորդ չեն, անգամ հակառակը:
Ես ինքս էլ լինելով կարկառուն ու անուղղելի ձախլիկ, մեր տոնի առթիվ ձեզ եմ ներկայացնում հետաքրքիր փաստեր մեր մասին:
- Աշխարհի բնակչության 3-5%-ն է միայն ձախլիկ, 90 տոկոսն աջլիկ է, մնացածներն էլ ամբիդեկստր են՝ մարդիկ, որոնք հավասարաչափ օգտագործում են երկու ձեռքն էլ:
- Ճապոնիայում ընդհուպ մինչև 20-րդ դար կնոջ ձախլիկությունը բավարար պատճառ էր՝ ապահարզան պահանջելու համար:
- Աջլիկները միջինում 9 տարի ավելի երկար են ապրում, քան ձախլիկները:
- Ձախլիկները օգնական աջ ձեռքն ավելի հաճախ են օգտագործում, քան աջլիկները՝ ձախը:
- Երեխայի՝ ձախլիկ ծնվելու հավանականությունը աջլիկ ծնողներ ունենալու դեպքում ընդամենը 2% է:
- Շատ ձախլիկներ երաժշտական լավ լսողություն ունեն ու ավելի հեշտ են տիրապետում երաժշտական գործիքների:
- Ձախլիկ սովորաբար լինում են տղամարդիկ, կանանց քանակը շատ ավելի փոքր է:
- «Աջլիկ» ու «ձախլիկ» տերմինները կիրառվում են ոչ միայն մարդկանց, այլ կենդանիների համար: Կատուների մեջ շատ են աջլիկները, մկների մեջ 44 %-ը աջլիկ է, 28%-ը՝ ձախլիկ: Իսկ այ բոլոր սպիտակ արջերը ձախլիկ են:
- Հետազոտությունը ցույց է տվել, որ 140 IQ-ից ավելի բարձր ցուցանիշներ գրանցողների մեջ ձախլիկները եռակի շատ են:
- Համեմատած աջլիկների հետ, ձախլիկներն ավելի լավ են ընկալում 3D տարածաչափությունը, ավելի արագ են վերլուծում ու կարողանում ի կատար ածել մի քանի բաղադրիչ պարունակող բարդ աշխատանքները:
- Ձախլիկ ուսանողների 26%-ը շատ հեշտ ու արագ է հասնում հաջողության ու աշխատանք գտնում:
- Պատմությունը փաստում է, որ ձախլիկների վերաբերյալ միշտ բացասական կարծիք է եղել, քանի որ եկեղեցին համարել է նրանց «թարս» ու սատանայական հակումներով օժտված: Մերօրյա եկեղեցին ծայրահեղորեն դեմ է նման ձևակերպումներին ու ձախլիկության մեջ ոչ մի վատ բան չի տեսնում:
- Այնուամենայնիվ, Աստվածաշնչում աջ ձեռքը հիշատակվում է ուղիղ հարյուր անգամ՝ կրելով միմիայն դրական իմաստ: Իսկ ձախը հիշատակվում է քսանհինգ անգամ՝ բացասական ենթատեքստով:
Սյունե Սևադա