Հայաստանում  և Սփյուռքում սիրված երգիչ։ 2011 թվականին արժանացել է ՀՀ վաստակավոր արտիստի կոչման: Երկար տարիներ ԱՄՆ-ում բնակվելուց հետո՝  2012 թվականին վերադարձել է Հայաստան։ Առաջիկայում հագեցած գրաֆիկով հյուրախաղեր է ունենալու ամերիկյան Նյու Յորք և Բոստոն քաղաքներում, ապա՝ Եվրոպայում։

  – Ո՞րն է Ձեր նախընտրած մարզաձևը, ինչո՞ւ: – Միանշանակ բռնցքամարտը։ 3-4 տարի զբաղվել եմ բռնցքամարտով։ Օլիմպիական խաղերին հետևում եմ, երկրպագում եմ մասնակից  բոլոր հայ մարզիկներին։

– Ո՞րն է Ձեր սիրելի ավտոմեքենան, մեքենա վարո՞ւմ  եք: – Գնահատում եմ ավտոմեքենայի հարմարավետությունը։ Նախընտրում եմ ամենագնացներ, վարում եմ «Toyota Lexus»:

– Ձեր նախընտրած բույրը: – Սիրում եմ յասամանի հոտը։

 – Ձեր նախընտրած ձայնը: – Հոսող ջրի ձայնը։

– Ինչի՞ց եք ամենաշատը վախենում: – Չեմ վախենում։ Զգուշություն եմ ցուցաբերում։

– Եթե հանկարծ հրդեհ բռնկվեր, և Դուք հնարավորություն ունենայիք տանից միայն մեկ իր փրկել, ի՞նչը կընտրեիք:– Եթե կարողանայի, կվերցնեի այն, ինչ ժողովուրդն է տվել, ինչ-որ շահել եմ այս տարիների ընթացքում։

– Եթե ընդամենը երեք հոգու ճաշի հրավիրելու հնարավորություն ունենայիք, ովքե՞ր կլինեին Ձեր ընկերակիցները:– Կուզեի հյուր ընդունել ուրարտական թագավոր Արամե Առաջինին։ Երկրորդ հյուրս կլիներ բազմաթիվ կյանքեր փրկած զորեղ բժիշկ։ Վերջին հյուրս կլիներ Հայաստանի դրոշը ներկայացնող ամենաուժեղ մարզիկը։